Sanghaah intodelh kan tum a, Mizoram châwm kan tum - Fisheries Minister

Fisheries minister Lalthansanga chuan nimin khan ZPM pisaa inkhawmah tuh sawiin, sanghaah Mizorama thar ngei hmangin Mizoram mipui chawm an tum thu a sawi.

Lalthansanga chuan, kalphung thar, mipui sorkar an din mekah vawi leh khata kalphung thlâk thut chu mipuiin an zo lo tih sawiin, "Zawi zawiin mipui rilru leh hnathawktute kawng dik kan zawhpui dawn a, dik leh rinawm taka thawktute'n malsawmna an dawng ang. Sanghaah intodelh kan tum a, kan sangha thar hmanga Mizoram châwm kan tum," a ti.

Mizoram kaihruai tawhte'n kalphung dik tâwk lo deuha an lo kaihhruai tawh ṭhin nia sawiin Lalthansanga chuan, "Kalphung tharah kan lut ta chiah a, hun inthlak danglamah Mizoram kan awm mek. Dik lo taka contract hna leh thil dang thawktute keini chuan kan hrem ngam dawn a, ram mipuite thil danglam kan hmuhtir dawn," a ti a; ZPM sorkarah ṭhalaite'n beiseina an nei thar niin a sawi.

Lalthansanga chuan, mi ṭhenkhatin sorkar an bei ṭhin chuan a tihnual dawn lo a, a tichak zawk nia sawiin, "An ṭhahnemngaihna leh duhthawh luatah na tak tak pawhin min sawi ang. Mahse, hengte hi kan insiamṭhatna tur leh chak zawka kan kal theihna tur a ni. Kan ram siamṭhatna turte kan hmachhawp chin ang zelah dik taka kalpui kan tum dawn," a ti.

Fisheries Minister chuan, sangha khawi tuite tan sangha chi an sem dawn nia sawiin, "A man aṭanga 70% chu sorkar tum tur a ni. Project lian kan theh thlak zinga pakhat phei chu central lamin min pawmpui tawh," a ti a; Sericulture department hnuaiah pawh hma thar lak an tum thu a sawi bawk.