Ram enkawl dan turah kan chiang - TBC Lalvenchhunga

Chakhei biala LADC MDC by-election neih tur puala vantlang inkhawmah MLA TBC Lalvenchhunga chuan, ram rorelna chu rim taka thawh ngai a nih thu te, an tihhlawhtlin theih loh tur kan tiam ve ngai loh te, ram an enkawl dan turah an chian thute a sawi.

TBC Lalvenchhunga hian nimin khan Chakhei biala khua - Chakhei, Chheihlu leh Siasi khuate tun hnai khan a tlawh a; vantlang inkhawmah thu sawiin, "Ram rorelna hi tih mai mai a ni lo a, rim taka hnathawh a ngai. ZPM hian kan tihhlawhtlin theih loh tur kan tiam ve ngai lo a, kan policy leh ruahmannate a hlawhtlinna kan hmuh hunah a rah sengtu leh chhawrtu tur chu mipui an ni," a ti.

ZPM-in sorkarna an chan hnuah danglamna an hmu nasa nia sawiin Lalvenchhunga chuan, "ZPM hian sum hman dik kan ngaisang a, sum thawk chhuak thei aiin thawk ṭha kan ram hian a mamawh zawk. Central-ah mi kan tlawn ngai lo a, tlawn pawh kan tum lo," a ti a; rorelna ṭha hnuaiah mipui chanvo a bo thiang lo tih a sawi.

TBC Lalvenchhunga chuan, "Kan ram kan enkawl dan turah kan chiang a, huaisen takin kan kal zel dawn. Central-a zawm neih leh neih loh avang hian kan chanvo hi a bo dawn lo a, Central aṭanga kan sum hmuhte hi rinawm taka hman a nih chuan kan ram tan hmasawnna tluantling a awm thei a ni," a ti bawk.