Bungraw thawn chungchang sawiho

Nimin khan Lunglei khawpuia delivery service kaltlanga bungraw inthawn chungchang sawiho a ni a; delivery service a ṭhat zawk nan inzirtirna tam zawk neih an rêl.

Ṭhutkhawm kaihruaitu Lunglei additional DC James Miahlung chuan, courier kaltlanga bungraw inthawnah ruihhlo thawn tel ṭhin a awm thu a sawi a, "Courier-te him zawk nan leh delivery chungchangah complaint awm ṭhinte sutkian nan district administration, courier leh delivery service-te thawhhona ṭha neih a ngai," a ti a, ruihhlo donaa theihtawp chhuahpuiah kal khawmte a sawm.

Lunglei SP J Lalmuankima chuan, courrier-te ruihhlo thawn nan hmang ṭhin an awm avangin bungraw thawntu leh a thawnate hriat chian a ngaih thu a sawi a, "Bungraw rinhlelhawm a awm chuan police-te hriattir zel a ṭha," a ti.

Ṭhutkhawmah hian, bungraw thawntu hriat theih nan Aadhaar card emaw, identity card emaw dil ni se, delivery service a ṭhat zawk nan leh a dawngtu tur dik takin a dawn theih nan customer dawnsawn dan te, phone-a mi biak dan mawi chungchangahte inzirtirna tam zawk neih ṭhin an rêl a ni.