Pension/thi chhungte sorkar hnaa thun a awm tawh dawn lo - Dy Speaker

Assembly deputy speaker Lalfamkima, Kolasib bialtu MLA chuan nimin khan a bial chhunga Khuangpuilam community hall sak thar a hawng a; khawngaihna avanga sorkar hnathawk pension/thi chhungte sorkar hnaa thun ṭhin chu kalphung tharah a awm tawh dawn lo tih a sawi.

Lalfamkima chuan, Mizoram sorkarin ram hmasawn nan kawng hrang hrangin hma a lak thu sawiin, "Aikal lak chungchangte leh sorkar hnathawk pension emaw, boral emaw vanga khawngaihnaa an chhungte hna eng emawa thun awm zeuh ṭhinte pawh kalphung tharah chuan a awm tawh dawn lo. Sorkar hna hrim hrim chu interview paltlang vek a ngai tawh dawn," a ti.

Deputy Speaker chuan, "ZPM sorkar thar chuan thil pawimawh tam tak zingah zirna, kawng leh hriselna a dah pawimawh hmasa a ni. Zirtirtute'n naupangte sikulah an thiamna khawp zirtir hi an tihmâkmawh a ni," a ti a; naupangte'n tuition kal an intihhmuh a, tuition kal loh chuan pass theih loh ang hiala inngaihnate a awm chu pawi a tih thu a sawi.

Khuangpuilam community hall hi bialtu MLA ni ṭhin PC Zoram Sangliana (L) hoa bul ṭan a ni a, MLA kalchhuak ta K Lalrinliana'n a chhunzawm hnuah December 2023 khan sak zawh a ni.