KHAWTHLIR

G20 YEA summit

Brazil khawpui pakhat Goiania-a tun hnaia G20 YEA (Young Enterpreniur Alliance) Summit 2024 neihah Mizoram aṭangin Robert Rohmingliana, Mark Advertising leh Francis Khiangte, Studioone Architechs Young Indians, Mizoram Chapter member-te an tel. Summit-ah hian ram hrang hrang aṭangin palai 500 chuang an tel a, Mizo ṭhalai pahnihte hi India palai mi 32 zingah an tel a ni.

Bungrua inhlân

Mizo Students' Union Gen. Hqrs chuan damdawi lam hmanrua chi hrang 21 an dawn chu Health department-in a ṭul anga an sem turin nimin khan Health minister Lalrinpuii hnenah an hlan. Minister chuan, bungruate chu ṭangkai taka hman a nih tur thu a sawi.

Kuhva phurh khap

Aizawl District Magistrate chuan thupek chhuahin, Aizawl district-ah dan phal loh kuhva phur lirthei veivâk an la awm ṭhin tih hriat a nih thu a tarlang a, "Aizawl district chhung khawi hmunah pawh danin a phal chin bak kuhva leh bungrua lak luh leh phurh phal a ni lo," a ti. Thupek bawhchhia chu IPC Section 188 hmanga hrem theih an ni.

ATM booth hawng

Reserve Bank of India (RBI) general manager Tongkhopao Lhungdim chuan nimin khan Chanmari-ah Mizorama Apex Bank ATM 36-na a hawng a; Mizo ṭawng ngeia inziahna ATM hawn a ni chu lawmawm a tih thu a sawi. Apex Bank hian branch 28 leh ATM booth 36 an nei mek a ni.

Silai hlan

Rev. T Laikai chuan kum eng emaw zat kaltaa Rev. RA Lorrain-a'n silai a pek chu MADC Art & Culture department-a dah turin MADC chief executive member M Laikaw hnenah nimin khan a hlan. T Laikai hian Rev. RA Lorrain chhungkua hriatrengna atan leh Evangelical Church of Maraland leh CCI (M)-te inremna hriatrengna atan a pe a ni.

Khawzawl NCORD

Khawzawl District Narco Coordination Center (NCORD) chuan nimin khan an chairman K Lalrohlua, bawrhsap kaihhruaiin ruihhlo tirem tura hmalak tawhna hrang hrang leh hmalak zel dan tur an sawiho.