Mizoramah ruihhlo dona ní hmang: Ruihhlo tam tham tak hâl ral a ni

Nimin June 26 kha ruihhlo dona ni, International Day Against Drug Abuse & Illicit Trafficking a ni a, Mizoram hmun hrang hrangah hman niin, Excise and Narcotics department leh Police department man ruihhlo Rs 1,94,77,15,436.55 (cheng nuai 19,477.15) hû hâl ral a ni.

Mizorama International Day Against Drug Abuse & Illicit Trafficking hmanna pui ber Vanpa Hall-ah chuan Chief Minister hoin hman a ni a; Excise & Narcotics department-in Bethani Multipurpose Farm, Phunchawngah court-a chinfel tawh ruihhlo tam tham tak chu END secretary Lalramsanga Sailo hoin an hâl ral.

Aizawla ruihhlo hâl ralna inkhawm hi END joint commissioner Peter Zohmingthanga, Drug Disposal Committee chairman ni bawkin a kaihruai a; Drugs Disposal Committee secretary H Lalchhuanawma'n ruihhlo man leh hâl ral chungchang a sawifiah. Ruihhlo hâl ralte chu chi 12 a ni a, a vaiin Rs 39,86,38,689.55 (nuai 3,986.38) hû a ni.

Mizoram Police pawhin nimin khan hmun hrang hrangah ruihhlo an hâl ral. Aizawlah chuan IGP (Law & Order) Lalbiakthanga Khiangte hoin Aizawl Zoological Park-a bawlhhlawh hâlna (incinerator)-ah heroin Rs 14,03,25,585 hû hâl ral a ni a; CID Crime, Aizawl, Lunglei, Saitual leh Hnahthial district police-te man khawm a ni.

Aizawla Police-in ruihhlo an hâlte chu heroin kg. 12.968 (Rs 3,89,04,000 hû), methamphetamine kg. 77.588 (Rs 10,08,64,400 hû), ganja kg. 108.437 (Rs 5,42,185 hû) leh khuh damdawi bûr 100 (Rs 15,000 man)-te a ni.

Police-te chuan Aizawl bakah hian district hrang hrangah Rs 1,40,79,97,842 hû ruihhlo an hâl ral bawk a; Aizawla police vekin an hâl nen Rs 1,54,83,23,427 hû a ni. Police leh Excise department hâl ral zawng zawng hlut zawng chu Rs 1,94,77,15,436.55 a tling.

Police thuchhuah tarlan danin, kuminah January 1 aṭanga June 24 thlengin ruihhlo Rs 66,82,35,070 hû an man tawh a; ruihhlo man kaihhnawihah mi 265 manin, thubuai 195 an ziak lut tawh a ni.

Nimin khan Vanapa Hall-a ruihhlo dona ni hman a ni a, khuallian chief minister Lalduhoma chuan, ruihhlo donaa thawhpuiah Mizoram mipui a sáwm a, "Kan fate drug laka an him theih nan hian chhungkua kan pawimawh a, nu leh pate'n kan fate thlithlai taima ila, nun kawng dik an zawhna tur a nih phawt chuan khauh taka khuahkhirh i hreh lo ang u, Pathian pawhin a phal a ni," a ti.

Chief Minister chuan, khawchhak lam ram ṭhenkhat chu khawvel hriata ruihhlo bupui, Golden Triangle an tih ṭhin a nih thu sawiin, "Chuta ṭanga ruihhlo lo chhuk thlakna kawngpuiah kan awm avangin hun rei tak ruihhloin min chîm buai tawh. Keini'n thapui thawhin do mah ila, kan ṭhenawm ramte'n an beih ve si loh avangin kan mal ṭan a, a sâwt mawh hle," a ti a; ruihhlo lut a tam avangin a man a tláwm a, ṭhalai tam takin ngawl an vei phah tih a sawi.

Khualzahawm Lalrinpuii, Health minister chuan, "Kawng dangah nasa takin hma sawn mah ila, a hmang ṭangkaitu tur mipui, a bikin kan ṭhangtharte ruihhloin min tihchhiatsak zel chuan a pawi dawn lutuk," a ti.

Excise & Narcotics minister Lalnghinglova Hmar pawhin thu sawiin, "Ruihhlo donaah sorkar hian mipui duhkhawp kan la phâk chiah lo a nih pawhin theihtawp kan chhuah a, kan bei zel dawn. Ruihhlo hian min chîm nasat avangin kil thum aṭangin sorkar, tlawmngai pawl leh kohhrante'n thapui thawha kan do a ngai," a ti. Ruihhlo ngaite enkawl leh an eizawnna khawp thiamna an neih theihna tura LESDE department hmalakna hnuaia hmalak an tum dante a sawi bawk.

Ruihhlo dona ni hmanna inkhawm hi chief secretary Dr Renu Sharma-i'n a kaihruai a; minister Lalthansanga Ralte, minister of state Prof. Lalnilawma, adviser to CM Lalmuanpuia Punte, MLA pahnih Lt.Col. Clement Lalhmingthanga leh Prova Chakma, sorkar hotu te, tlawmngai pawl leh kohhran aiawhte leh zirlaite an tel. Ruihhlo ngaite enkawlna lama thawk ṭha B Sangkhumi leh Sangthankima te hnenah chawimawina hlan a ni.

International Day Against Drug Abuse & Illicit Trafficking hi UN General Assembly-in December 1987-a resolution a pawm angin khawvel pumah hman ṭhin a ni a, kumina thupui chu, 'Kan dinhmun a chiang e, invenna lamah ṭan ila ang u' tih a ni.