EFCC-ah post ruak 63.50% a awm
Environment, Forest & Climate Change (EFCC) department-a post awm zat (sanctioned post) 1,337 zinga 488 (36.49%) chiah hnawhkhah a ni a, post ruak 849 (63.50%) a awm. Hna (post) chi hrang pakuaah sanctioned post hnawhkhah miah lohna a awm bawk. Hengte avang hian thing phun, ramngaw venhim leh thil dangah department-in harsatna an tâwk mek niin an tarlang.
RTI Act, 2005 tlawhchhana zawhna EFCC department SPIO-in a chhan danin, EFCC department hnuaiah hian group A, B, C leh D-ah sanctioned post 1,337 a awm a, post 488 hnawhkhah niin, post ruak 849 a awm. Post ruak tam berna group C-ah sanction post 755 zinga 518 (68.12%) a ruak.
EFCC department hnuaia hna lak hnuhnun ber chu March 13, 2024-a UDC lakna a nih thu leh Mizoram sorkarah ACF panga, forest ranger 15, forester 100, forest guard 200, driver 14 leh group D 25 lak dilna an thehluh mek thu SPIO chuan a tarlang.
Thawktu indaih lohna vanga harsatna an tawh dan zawhna chhangin SPIO chuan, "Thawktu indaih lohna avang hian thing phun (plantation), ramngaw venhim, office hna, dan lekkawh leh sorkar programme hna pawimawh hrang hrang kalpui kawngah te, EFCC department tih tur hrang hrang hlen chhuah kawngahte harsatna tawh mek a ni," a ti.
EFCC department-a group A-ah hna chi hrang 17 awmin, chu'ngah chuan sanctioned post 77 a awm a; sanctioned post 77 zinga 40 hnawhkhah niin, post ruak 37 (48.05%) a awm.
Group A-a post ruak tamna ber chu Mizoram Forest Service (MFS) a ni a, MFS sanctioned post 39 zinga 14 hnawhkhah niin, post ruak 25 (64.10%) a awm mek. Group A-ah vêk hian botanist leh orchidiologist-ah sanctioned post pakhat ve ve awm mah se, hnawhkhah a ni lo.
EFCC department-a group B-ah hna chi hrang 15 awmin, sanctioned post 308 a awm a, post 117 hnawhkhah niin, post ruak 191 (62.01%) a awm. Group B-ah hian steno grade-II (post pakhat), forest SI (post pakhat) leh surveyor (post 22)-te chu hnawhkhah loh vek (100% vacant) a ni.
Group B post dang hnawhkhah loh tam zualte chu - draftsman post 11 zinga 10 (90.91%), forest ranger post 78 zinga 61 (78.21%), deputy ranger post 59 zinga 33 (55.93%), UDC post 85 zinga 37 leh assistant post 31 zinga 13-te a ni.
EFCC department-ah hian group C-ah hna chi hrang 10 leh group D-ah hna chi hrang 13 a awm. Group C-ah PT instructor leh despatch rider-te chu hnawhkhah loh vek (100% vacant) a ni a, group D-ah pawh conductor leh mahout-te chu hnawhkhah loh vek (100% vacant) a ni bawk.
Group C-ah forest guard post 417 zingah post ruak 332 (79.62%) awmin, forester post 219 zingah post ruak 127 (57.99%) a awm a; group D-ah forest constable post 40 zinga pathum chauh hnawhkhah niin, post ruak 37 (92.50%) a awm a ni.