Vawiinah LADC-ah VC inthlan leh MDC by-election nei dawn

Vawiin hian Lai Autonomous District Council (LADC) huam chhungah village council inthlanpui neih a ni dawn a; Lawngtlai Chandmary bialah MDC by-election neih a ni bawk ang.

Inthlan chi hnihah hian zing dar 7 aṭanga tlai dar 5 thleng vote thlak hun hawn a ni dawn a; vote thlakna atan VC inthlanah postal ballot hman a ni ang a, MDC by-election-ah chuan electronic voting machine hman tur a ni thung.

LADC huam chhungah hian VC 99 a awm a, VC 97-ah inthlan a ni dawn. Hmawngbuchhuahah chuh tuma hming pete'n dan an zawm kim loh avangin hnâwl vek an ni a, inthlan theih a ni lo a; Saikhawthlirah VC member zat chiah candidate an awm avangin inthlan a ngai lo bawk a ni.

MDC by-election neihna tur Lawngtlai Chandmary MDC bialah hian polling station pali - Lawngtlai Chandmary North-I, Lawngtlai Chandmary North-II, Lawngtlai Chandmary South-I leh Lawngtlai Chandmary South-II a awm a; voter 2,798 awmin, mipa 1,313 leh hmeichhia 1,485 an ni.

MDC by-electionah hian candidate pathum an awm a, chu'ngte chu ZPM candidate F Hrangtukhuma, BJP candidate K Lalawmpuia leh MNF candidate C Lalsawmzuala te an ni a, INC chuan candidate hranpa nei loin MNF an thlâwp a ni. Vote tlate chu July 1, 2024-ah chhiar a ni ang.

LADC inthlanpui hnuhnung berah Lawngtlai Chandmary bialah hian Dr Lorrain Lalpekliana Chinzah thlan tlin a ni a, kum 2023-a MLA inthlanpuiah Lawngtlai East bial aṭanga thlan tlin niin, MDC a nihna a bansan a, chuvang chuan by-election neih a ngai ta a ni.