KHAWTHLIR

ZPM an tling

June 25, Thawhlehnia Sakawrtuichhun Local Council seat ruak pakhat hnawhkhahna tura by-election neihah ZPM candidate Chhuahthanga thlan tlin a ni. He inthlanah hian voter 1,665 zinga 843 (50.63%)-in vote an thlak a, Thawhlehni zan khan vote chhiar a ni a, vote hmuh dan chu - ZPM-in 418, MNF-in 300 leh INC-in 113 a ni.

Mei zu man

Aizawl District Anti Tobacco Squad chuan nimin khan Secretariat building-ah COTPA dan bawhchhiaa phal lohna hmuna mei zu an awm leh awm loh an endik a; dan bawhchhia mi paruk manin pawisa an chawitir.

AR-in thilpek hlân

Assam Rifles chuan kumina International Day Against Drug Abuse & Illicit Trafficking (June 26) pualin June 24, 2024 khan Ṭawngṭai Bethel Camping Centre-ah hun an hmang a, thilpek eng emaw zat an hlân. June 25 khan TNT, Aizawlah thilpek eng emaw zat an pek bakah, TNT hotu Sangthankima'n Padma Shree a dawn lawmpuina an hlan bawk.

Dragon fruit hralh

Thenzawl Dragon Fruit Growers & Marketing Society chuan dragon fruit an tharte chu June 25, Thawhlehni khan Local Soda Tui Bon Pvt. Ltd. hnenah tam tham tak an hralh. Dragon fruit an chinna hmunah kg. 1 Rs 150-in an hralh a ni.

YMA-in thisen pe

YMA, Seling Branch chuan June 25, Thawhlehni khan an khuaah thisen pek rûnpui an huaihawt a, Civil Hospital, Aizawl Blood Centre tan thisen unit 95 an pe a, petute mipa 83 leh hmeichhia 12 an ni.