Naupang rûkbo leh venhim chungchang Champhai leh Mamitah sawiho a ni

Nimin khan Champhai leh Mamitah 'Sensitization workshop/campaign on prevention and combating child trafficking in 100 bordering and adjoining districts of India' an buatsaih a ni.

Mamitah chuan SDO (Sadar) Carolyn LB Khiangte hoin DC conference hall-ah zirhona buatsaih a ni a; Mamit additional SP Lalpianthanga leh district child protection officer C Lalremruati ten naupang rûkbo chungchanga thil pawimawhte an sawifiah.

Champhaia zirhona chu State Commission for Protection of Child Rights (SCPCR), Champhai District Child Protection Unit (DCPU), National Commission for Protection of Child Rights (NCPCR) leh Champhai district administration-te buatsaih a ni a, bawrhsap James Lalrinchhana'n a hmanpui.

Additional district & sessions judge Vincent Lalrokima'n mihring rûkbo leh hralh chungchanga dan hrang hrang te, fimkhur a ṭul dante a sawifiah.

Bawrhsap James Lalrinchhana chuan, India ramah naupang rûkbo a hluar thu sawiin, "Minute 8 dan zelah naupang pakhat zel rûkbo ang a ni a, hei vang hian NCPCR pawhin a ngai pawimawh hle. Champhai district hi India rama ramri depa awm district 100 zinga tel a nih avangin naupang rûkbona atana hmun remchang tak a ni," a ti a; kal khawmte chu naupang rûkbona thleng thin vèn kawnga thawhhopuiah a sâwm.