District-ah ruihhlo dona ni hmang

27th June, 2024

Nimin khan Mizorama district ṭhenkhatah ruihhlo dona ni, International Day Against Drug Abuse & Illicit Trafficking hman a ni a, district ṭhenkhatah ruihhlo hal a nih laiin, district ṭhenkhatah ruihhlo ṭhat lohzia inzirtirna hun hman a ni.

SIAHA

Siaha Police bultumin International Day Against Drugs Abuse and Illicit Trafficking, 2024 hman a ni a; District Hospital incinerator-ah heroin (No.4) gram 137.43 leh alprazolam mûm ruk hâl ral niin, a vaiin Rs 4,12,520 hû a ni.

Siaha SDO (Sadar) Ngurthansanga chuan, khawtlang him nan leh ṭhalaite ruih theih thila an fihlim theih nan Police leh Excise kutah engkim dah theih a ni lo tih sawiin, ṭanrualpuiah tlawmngai pawl, kohhran leh mipui a sawm. Siaha SP KL Vulmawia pawhin thu sawiin, "Police-te'n theihtawp chhuahin zu leh ruihhlo do ṭhin mah se, do rêm a har a, do rêm turin thapui chhuah a ṭul tak zet a ni," a ti.

LAWNGTLAI

Lawngtlai Police-te'n ruihhlo dona ni pualin kum 2023-24 chhunga ruihhlo an man, international market-a hralhna anga chhûta Rs 3,40,800 hû chu nimin khan an tichhia.

Ruihhlo tihchhiatte chu heroin gram 49 (Rs 1,47,000 hu), ganja kg. 10.669 (Rs 5,2500 hu) leh opium kg. 2.355 (Rs 1,41,300 hu)-te a ni a; Lawngtlai bawrhsap Cheemala Siva Gopal Reddy, SP Lokeshwaran R leh District Hospital medical superintendent Dr Richard Lalrinmawia Ralte ten an telpui a ni.

MAMIT

Excise & Narcotics department, Mamit chuan St. Francis of Assisi Bethany High School-ah International Day Against Drugs Abuse and Illicit Trafficking, 2024 pualin ruihhlo hmansual chungchang inzirtirna, awareness campaign an buatsaih a; zirlai 350-te hnenah ruihhlo ṭhat lohzia leh hlauhawmzia bakah, inven pawi-mawhna leh inven dan turte an hrilhfiah.

KHAWZAWL

Khawzawl DC auditorium-ah bawrhsap K Lalrohlua hoin ruyihhlo dona ni hman a ni. He ni pual hian Khawzawl District Coordination Center (NCORD) chuan Khawzawla ruihhlo ngaite enkawlna pahnih - Grace Camping Center leh Chhanchhuahna Home chu an chairman K Lalrohlua hoin an tlawh a, ṭanpuina Rs 5,000 ve ve an hlan.