ASF vangin vawk 460 a thih belh

African Swine Fever (ASF) vangin nimin khan vawk 178 a thih bakah vawk 282 suat a ni a, a vaiin vawk 460 a ni. Kumin chhungin Mizorama khua/veng 127-ah nimin thleng khan ASF vanga vawk thi leh suat 10,718 a awm tawh.

AH&Vety department-in chhinchhiah danin, January 1 aṭanga nimin thleng khan Mizorama khua/veng 127-ah vawk hri a léng tawh a, chu'ng hmunahte chuan hri vanga vawk thi 3,658 a awm a, hri darh tur vên nan vawk 7,060 suat a ni tawh. Kumin chhunga nimin thlenga hri vanga vawk thi leh suat belhkhawm chu 10,718 a ni.

Nimin bik khan Aizawl, Serchhip leh Saitual district-a khua/veng 19-ah ASF vangin vawk 178 a thi a, vawk thi tamna ber Durtlangah 35 a thi.

Nimin vek khan Aizawl, Serchhip, Mamit, Saitual leh Khawzawl district-ah hri darh zel tur ven nan vawk 282 suat a ni a; Mamit district-a Reiek khuaah vawk 59 suat niin a tam ber. Nimina vawk thi leh suat zawng zawng chu 460 a ni.