KHAWTHLIR

Thisen pe

Nisapui Bial KṬP chuan nimin khan Nisapui Kohhran hall-ah blood donation camp an huaihawt a, mipa 31 leh hmeichhia pakhatte'n Synod Hosiptal tan thisen unit 32 an pe.

MoU ziak

All Mizoram Farmers’ Union (AMFU) leh DDK, Aizawla Kuthnathawktute Ṭhian/Mandhi Bhav chuan nimin khan AMFU office-ah memorandum of understanding (MoU) an ziak. MOU hnuaiah hian thlai thar lakna leh hralhna man hrang hrangte AMFU buatsaih chu Kuthnathawktute Thian /Mandhi Bhav, DDK, Aizawlah puan
ṭhin a ni ang.

Mei zu man

Aizawl District Anti Tobacco Squad chuan nimin khan Ṭhuampui leh Zemabawkah puipunna hmun leh sikul 12-ah COTPA bawhchhia an awm leh awm loh an enfiah a; phal lohna hmuna mei zu mi panga manin pawisa an chawitir. Sikul aṭanga ft. 300 bial chhunga vaihlo leh a kaihhnawih zuar dawr pakhat man bawkin, pawisa an chawitir bawk. Phal lohna hmuna mei zu an mante hi CMO Aizawl East leh AMC Office-ahte a ni.

Helipad hmang

Champhai Sesih tlanga helicopter ṭumhmun (helipad) siam thar chu June 7, 2016 aṭang khan hman ṭan a ni. Helipad hi December 2014-ah siam ṭan niin, a siam nan NLCPR aṭanga sum hmuh nuai 54.6 hman a ni a, PWD kaltlangin contractor-te'n an siam a ni. Helipad hi Aizawl leh Champhai inkara helicopter service ṭum nan hman a ni ang.

Zirlai chawimawi

MZP headquarters, Saitual chuan nimin khan Saitual College jubilee hall-ah kumina HSLC leh HSSLC examination-a zirlai ti ṭhate chawimawina hun an buatsaih a, Home minister R Lalzirliana'n a hmanpui. R Lalzirliana chuan, "Khawvelah dinhmun ngai rengin kan awm lo a, Pathian kan ṭih a, theihtawp kan chhuah chuan kan tana ṭha tur leh kan nihna âwm takah min dah ṭhin a ni," a ti.