April 2016-a lak NLUP bawng 16 thi tawh NLUP bâwng leiah dik lo a awm - MPC Thalai

MPC ṭhalai leh Durtlang North Multi Commodities Societies hruaitute chuan, nimin khan Aizawl Press Club-ah thuthar thehdarhtute an kâwm a; kumin April thlaa NLUP hnuaia bawng lei danah thil dik lo a awm ngeia an hriat thu leh, thla hnih chhungin bawng 16 an thih tawh thu an sawi a; bawng leitute an dem.

MPCY president V Lalthan-zuala chuan, NLUP hnuaia bawng pahnih leina atan Rs. 1,30,000 ruahman a nih tih sawiin, "Bawng dawng turte chu Shillong-ah bawng la turin an kal a, sorkarin Rs. 5,000 ṭheuh a pài a ni. Bawng chi ṭha lak tumin an kal a, mahse an lo thlan khawm sa bak hmun danga mi thlan an phal lo a, lungawi lo takin an duh loh bawng an lei a ni," a ti.

V Lalthanzuala sawi danin, NLUP hnuaia bawngte chuan natna hri an vei a, Durtlang North-a bawng an dawn zingah 24 chu an damlo a, chu'ng zingah 15 chu an thi tawh a ni.

Shillong-a bawng zawng khawm tura ruat Rai-a leh Mizoram aṭanga bawng endik tura kal AH&Vety doctor Lawm-sanga'n kut hnathawktute an rawk ngeia an hriat thu sawiin MPCY President chuan, "Bawng vulhtute lunghnûr tak awmte hi hmalakpuina a la awm lo hian he eiruknaah hian AH&Vety minister C Ngunlianchunga leh a duhsakte an tel ngei a ni tih a tichiang," an ti a; AH&Vety Minister chu báng ngei tura an phût thu a sawi.

Durtlang North Multi Com-modities Societies hruaitute chuan, bawng leina tura sum dah tam si, bawng ṭha lo lei a ni chu pawi an tih thu sawiin, "AH&Vety Minister chuan thil dangah pawh min ngaihsak a, kan dem lo. Bawng lakhawmtute hi kan dem a, kut thnathawktute min hmusit hleah kan ngai. Kan bawng dawn hi Aizawlah pawh Rs. 10,000 vel bakin an lei duh lo ang," an ti.

Durtlang North Multi Com-mo-dities Societies hruaitute sawi danin, bawng an lakkhawm hi a chhe hlawm hle a, a dang an duh a nih chuan pawisa thawh belh mai tura tih an nih avangin lungawi lo takin bawngte hi an la a ni. An bawng lakte chu a dam
ṭha pawhin hnute an nei tlem hle.

Bawng changtute'n Vanglaini palai zawhna an chhàn danin, NLUP hnuaia Shillong-a bawng la turte hian April 5, 2016-ah Aizawl chhuahsanin, April 6-ah Shillong an thleng a; April 7-ah Aizawl panin an haw a, Sonapur leh Vairengtea an riah hnuah April 10-ah Aizawl an thlenpui a ni.

Shillong-a bawng an lak dawnah lungawi takin bawngte chu an dawng tih ziakin thu an dah nia sawi chungchanga zawhna chhangin, bawng vulhtute chuan, "Hming ziak lo thei loin min siam a, bawngte hi duh lo thei loin min siam a ni," an ti.

An bawng lakte chuan natna a keng haw a, in an thlenpui aṭanga kar khat liam hmain an natna a lang chhuak tih an sawi bawk.