Minister-in bawnghnute dahkhawlna a hawng

AH&Vety minister C Ngunlianchunga chuan, nimin khan Serkhanah Serkhan ‘A’ Milk Producers’ Cooperative Society Milk Collection Center-a bawnghnute litre 1,000 dahkhawlna Bulk Milk Cooler a hawng.

C Ngunlianchunga chuan, chhungkaw 180 vel awmna Serkhana chhungkaw 60 vel bawng vulha eizawngte'n bawnghnute an thar tam avangin an mamawh Bulk Milk Cooler dah a nih thu a sawi a, "Hei hian Serkhan khaw mipui taimakna leh ṭhahnemmgaihna bakah, sorkarin kut hnathawktute hma a ngaihvenzia a tilang a ni," a ti.

Bulk Milk Cooler hi bawnghnute sâwr hlim, a sawngbawlna hmun thlenpui hmaa a chhiat mai loh nana dah khawlna leh dah vawhna a ni.

Khawl hian bawnghnute chu censius degree 4 aia sang loah a vawng ṭha ang a, chu chu a phurhna tur bik motor, road milk tanker hmangin MULCO Dairy Plant-ah phurh thlen ṭhin a ni ang.