Ex-MNA-in ruhro phawrh chhan an sawifiah

Ex-MNA Association chuan, nimin khan Aizawl Press Club-ah thuthar thehdarhtute kâwmin, tun hnaia Mizoram tana martar mi palite ruhro phawrh a, Martarte Thlànmual, Luangmuala phum an nih chhan an sawifiah.

Chief minister Lal Than-hawla'n Ruhro hmanga inawih nun tuma a puh chu mak an tih thu leh an dem thu an sawi.

Ex-MNA president Rochung-nunga chuan, May 30, 2016-a ruhro an phawrh leh June 3-a Martar Thlanmuala an phûm leh takte chu an chhungte
ṭheuh remtihna anga tih a nih thu a sawi a, "Martarte hian tu pawl emaw, eng party emaw bik tana nunna hlân an ni lo a, Mizo zawng zawng tana nun hlan an nih avangin, Mizo mipui zawng zawngin kan zaha kan chawimawi kan beisei laiin, CM Pu Lal Thanhawla'n rin loh zawnga thu a sawi mai kha mak kan ti hle a ni," an ti.

Rochungnunga chuan, martar pali ruhro an lak chhuahte chu an thisen far tawp thlenga Zoram tana rinawm, ram leh hnam chhan nana nunna hlante an nih thu sawiin, "Min hriatpuitute chu Buarpui, Kawlhawk leh Lungdai khawtlang an ni," a ti a; Lal Thanhawla chu a ringhlel a nih chuan heng khawtlang hruaitute zawtfiah mai turin an chah.

Ex-MNA hruaitute chuan, zalenna an sual kum 50-na kal mekah Ex-MNA ten ram leh hnam tana zalenna suala nunna hlantute sûlhnu chhui leh an ruhrote a theih ang anga seng khawm an tum thu an sawi a, "Hnam tana kan rammutpuite hmun hrang hranga awmte tlawh chhuah leh India sipai nena kan inkahna hmun fan chhuah kan tum a ni," an ti.

Ex-MNA hruaitute chuan, CM Lal Thanhawla chu ngaihtuah chiang se chuan inpuh nana hman chi a nih lohzia a hre tura an ngaih thu an sawi.