Kum 2016 chhungin police-in ILP nei lo mi 2,221 man tawh

Aizawla police station hrang hranga police-te chuan, June 6, 2016 khan Aizawla ILP nei lo leh dan bawhchhia hnam dang an vai a, mi 74 an man. Police-te hian kuminah ILP dan bawhchhia hnam dang 2,221 an man tawh.

Police thuchhuah tarlan danin, June 6 zinga hnam dang dan bawhchhia an mante chu Court-ah hruai an ni a; thiam loh chantir mi 64-te chu an awmna ramah thawn haw niin, Mizoram police-te'n Mizoram-Assam ramri thleng an hruai a ni.

Police thuchhuah chuan, kum 2016 chhung-in Mizoram pumah ILP nei lo leh bawhchhiate zawn chhuah hna neih
ṭhin a nih thu tarlangin, "ILP bawhchhia mi 2,221 man niin, Court-in thiam loh a chantir mi 2,040 chu Mizoram páwnah thawn haw an ni tawh," a ti.

District ṭhenkhatah chuan ILP nei lote thawn hawna tur remchang a awm loh chuan ni 10 chhunga ILP siam turin Court-in hun a pe ṭhin a; anmahni remchan dan anga Mizoram chhuahsan tura tih an awm ṭhin bawk.