Population Based Cancer Registry report Cancer chi 5-ah Mizoram sang ber
India rama cancer natna chungchanga report thar ber, Population Based Cancer Registry (PBCR) 2012-2014 in a tarlan danin, Mizoram chu thil chi ngaah India ram state zinga cancer hluar berna state a ni.
Mizoram PCBR principal investigator Dr Eric Zomawia hnen aṭanga thu dawn danin, India ramah cancer hluar dan chhui chiang turin kum 1982-ah Indian Council of Medical Research (ICMR) hnuaiah National Cancer Registry (NCRP) din a ni a; NCRP hnuaiah cancer registry chi hnih - Population Based Cancer Registry (PBCR) leh Hospital Based Cancer Registry (HBCR) a awm. Mizoramah chuan kum 2003-ah PBCR a ding a; NCRP hian kum 2/3 danah report a tichhuak ṭhin.
PBCR report thar ber, ‘Three year report of Population Based Cancer Registries 2012-2014’ chu May 19, 2016 khan Department of Health Research & Director General-a secretary Dr Soumya Swaminathan chuan New Delhi-ah a tlangzarh a; tlangzarhna hunah hian Mizoram PBCR principal investigator Dr Eric Zomawia a tel. Report-ah hian state cancer registry 27-te data tarlan a ni.
India ramah kum 2016-ah cancer vei mi nuai 14.5 an awm a, kum 2020-ah chuan nuai 17.3 an awm tura ngaih a ni. India rama cancer tam ber pathumte chu - hnute, chuap leh chhùl hmáwr cancer-te a ni. Vaihlo vanga cancer chu cancer vei zawng zawng zinga 30% vel an ni a; vaihloin cancer a thlen theih - rílpui, prostate, chuap, tâi, hnute, chhûl, chi báwm cancer a pun zel laiin, chhùl hmáwr cancer-in kiam lam a pan thung.
PCBR report-ah hian Mizoram chu chi thumin zir chian a ni a, chungte chu Mizoram state, Aizawl district leh district dang zawng a ni.
India ram PBCR 27 zingah Mizoram chu thil chi nga - mipa cancer zawng zawng belhkhawm, mipa chuap, hmeichhe chuap, mipa rílpui leh hmeichhe rílpui cancer-ah a sang ber.
Hmeichhe cancer belhkhawm, hmeichhe hrawk chung, mipa pumpui, hmeichhe pumpui, mipa chuap, hmeichhe chuap leh hmeichhe chhùl hmáwr cancer-ah a sang ber dawttu a ni.
Report thara a lan danin, India rama mipa cancer vei hluarna ber district pathumte chu (a tam dan indawtin) - Aizawl district, Pa-pum-pare district (Arunachal Pra-desh) leh East Khasi Hills district (Meghalaya)-te a ni a; India rama hmeichhe cancer vei hluarna ber district pathumte chu (a tam dan indawtin) - Papumpare district (Aru-nachal), Aizawl district leh Kamrup Urban district (Assam)-te a ni.
Aizawla cheng mipa kum 74 dam thlengte'n an dam chhungin mi pali zela pakhatin cancer veina chance an nei a; Aizawl district-a hmei-chhia kum 74 dam thlengte'n an dam chhungin mi panga zela mi pakhatin cancer vei theihna chance an nei.
Mizorama cheng zingah kum thum (2012-2014) chhungin cancer vei mi 4,656 hmuhchhuah an awm a; chungte chu mipa 2,567 leh hmeichhia 2,089 an ni a, kum tin mi 1,552-in cancer an vei thar ang a ni.
Mizoramah cancer vanga thi mi 2,176 am awm a, chungte chu mipa 1,346 leh hmeichhia 830 an ni a; kum tin mi 711 an thi ang a ni.
Mipa leh hmeichhia belhkhawma Mizorama cancer hluar zualte chu - pumpui (mi 710), chuap (mi 688), chaw dáwt (mi 603), chhûl hmáwr (mi 333) leh hnute (mi 271) an ni.
Mizoram cancer dinhmun (2012-2014)
Mipa cancer hluar zual
1. Pumpui (mi 475)
2. Chaw dáwt (mi 416)
3. Chuap (mi 362)
4. Thin (mi 140)
5. Hrawk hnuai (mi 129)
Hmeichhe cancer hluar zual
1. Chhùl hmáwr (mi 333)
2. Chuap (mi 326)
3. Hnute (mi 271)
4. Pumpui (mi 235)
5. Chaw dáwt (mi 87)