MNF ṭhalaite'n ration card an hâl leh FCSCA Minister báng turin an phût nawn

MNF party ṭhalaite chuan, Food, Civil Supplies & Consumer Affairs (FCSCA) department-in ration card dik lo an siam ṭhat tawhah dik lo tam tak a la awm avangin nimin khan Mizo Hnam Rûn kawtah ration card dik lote an hâl leh. Supply minister John Rotluangliana chu a hna tlin loah ngaiin báng turin an phût nawn.

MNYF president K Vanlalvena chuan, Food Security Act hman a nih tak vanga sorkarin ration card a siamah dik lo tam tak a awm avangin MNF
ṭhalaite'n Vanapa Hall kawtah ration card copy an hâl tawh tih a sawi a; ration card dik lo an siam ṭhat leh tawhah pawh dik lo tam tak a awm tih sawiin, tun ṭuma ration card an hàl lehah chuan a copy mai hâl loin, a ration card dik lo ngei an hâl tih a sawi.

K Vanlalvena sawi danin, ration card siam ṭhat lehah chuan hming chuang tur chuantir loh te, hming chuang lo tur dah tel te, hming ziah dik loh leh dik lo dang tam tak a awm.

MNYF President chuan, Supply Minister chu buhfai supply tur thlan danah dik lo taka thil ti leh duhsak bik neia an ngaih thu sawiin, chu chu corruption lian taka an ngaih thu a sawi a, "Tun hnaiah FCSCA officer pakhat chu buhfai tihchingpen vangin a hna aṭanga bàn a ni a, officer dang pakhat chu sorkar motor rawra phurh nan a hman avangin suspend a ni. Heng officer-te hi sorkarin a bàn a nih chuan, anni aia corruption lian zawk titu Supply Minister hi bàn ngam turin Chief Minister kan phût a ni," a ti.

Supply Minister chu báng turin an nawr chhunzawm zel dawn tih sawiin, K Vanlalvena chuan, "Supply Minister hi tharum thawh chíng ni mah se, báng tura kan nawrnaah tharum kan hmang ve lo ang," a ti.

Supply Minister chu a thurualpuite nen kum 2003-ah chief minister atana Zoramthanga lak luh dawnah tharum hmangin an lo dang a, motor an lo vawmsak thu leh, Dawrpuia a kawtah a motor-in traffic police a sut luih thu a sawi.