Mizoram police-ten Yoga an kalpui dawn Meditation tel loin Yoga tih theihah ngai

Mizoram police-te chu an taksa sâwi-zawina atan Yoga tihtir an ni dawn a, instructor turte training pek an ni. Yoga instructor Mizorama châm mek Laxmi Hota chuan, rilru insawrbingna (meditation) tel loin Yoga a tih theih niin a sawi.

Nimin khan AYUSH department office-ah thuthar thehdarhtute tan Yoga chungchang inhrilhhriatna hun buatsaih a ni a; Mizoram police-a Yoga atana nodal officer atana ruat PC Lallianthanga, Wireless SP chuan Mizoram police-te chu an taksa sâwizawina atan Yoga tihtir an nih tur thu a sawi.

PC Lallianthanga sawi danin, police-te tan district pariatah Yoga hmanga insawi-zawina buatsaih a ni dawn a, a senso tur chu sorkar laipui tum tur a ni. District tinah Rs. 8,00,000 ruahman a ni a, first instalment pek chhuah a ni tawh.

Mizoramah Yoga instructor an awm loh avangin instructor tur mi 20 lak an ni a, anni zirtir tur hian state páwn aṭangin instructor Laxmi Hota chah luh niin, ani hian a zirtir mek. Training zawh a nih hunah district tinah instructor pahnih ṭheuh dah an ni ang a, a dang pali chu a ṭul huna hman theih turin an awm ang.

Laxmi Hota chuan, meditation chu stress tihrehna atana thil ṭha tak a ni tih sawiin, "Stress hi tihreh harsa tak a ni a, a tihreh dan ṭha tak chu meditation hi scientifically-a finfiah a ni," a ti.

Vanglaini palai zawhna chhangin Laxi Hota chuan, Yoga hnuaiah rilru leh taksa insâwizawi dan chi hrang hrang a awm tih sawiin, "Miin meditation hi tih an duh lo tlat a ni pawhin, a tel lo pawhin Yoga hi tih theih tho a ni," a ti. Meditation hi Mizoram Kohhran Hruaitute Committee-in Yoga an duh loh chhan zinga pakhat a ni.

AYUSH hotute chuan, Mizoramah Yoga chungchang hriat chian tâwk loh vanga sawisel an awm ṭhin thu sawiin, "A hre chiang duh tan chuan kan office-ah pawh zawhfiah theih reng kan ni. June 16 hian Lal Thanhawla audito--rium-ah Yoga chungchang inzirtirna a duh apiang tan kan buatsaih dawn a, zawhna zawh duh nei tan pawh zawh theih a ni ang," an ti.