Chief Minister-in Neihloh khua a tlawh

Chief minister Lal Thanhawla chuan June 8, 2016 khan Neihloh khua, Serchhip district a tlawh a; khaw mipuite nen an inkawm bakah, a pualin vantlang inkhawm buatsaih a ni.

Lal Thanhawla chuan, hma-sawnna dawng turin rilru puthmang leh ngaihtuahnate inbuatsaih hmasak a ṭul tih sawiin, "Sorkarin mipui mamawhte hre reng chungin mamawh tak tak phuhrûk hmasak a ngai pawimawh ber. Chutih rualin, duhsak leh malsawm tlak ni turin kan awm em tih kan ngaihtuah a pawimawh," a ti.

Sorkarin economic programme thar, New Economic Development Programme (NEDP) a duang tih sawiin CM Hawla chuan, "NEDP hi sorkar flagship programme kalpui mek NLUP chhunzawmna tur a ni," a ti a; NEDP chu NLUP hnuaia hlawhtling zualte tihhlawhtlinna atan leh vanduaina vanga hlawhtling fumfe lote chhawmdawlna tura duan a nih thu a sawi.

Chief Minister hian Neihloh khua hi football jersey set khat, football pakhat, volleyball pahnih, volleyball net leh silpauline pariat a pe a ni.

Neihloh khawtlang hruaitute chuan, an khuain hma a sawn theihna atana kawng hrang hranga theihtawp a chhuahpui avangin Chief Minister hnenah lawmthu an hrilh.

Neihloh khua hi in 70 vel niin, kum 1995-ah lirthei tê chi kal theihna kawngin a pawh a, kum 1994-ah electric pawh luh a ni. NLUP hnuaiah ṭanpuina dawngtu chhungkaw 48 an awm a, a NLUP kaltlangin ṭanpuina Rs. 34,00,000 vel an dawng tawh a ni.