Zamuang H/S zirtirtute bâng turin phût

Mamit district-a Zamuang JAC leh zirlai nu leh pate chuan Zamuang High School-a zirtirtute'n sikulah ruihhlo ti chungin naupangte an zirtir ṭhin niin an tarlang a; nimin khan lungawi lohna an lantir a, ruihhlo ti chunga class la ṭhin zirtirtute chu báng turin an phût.

Zamuang JAC leh zirlai nu leh pate hian nimin khan resolution pass in, Mizoram sorkar chu Zamuang H/S-a zirtirtu ruihhlo ti ṭhinte bàn turin an phût a; thu leh awm hma chuan naupangte zikul kaitir an tum loh thu an tarlang.

Zamuang JAC thuchhuah chuan, ruihhlo ti chunga zirlaite zirtir ṭhin zirtirtute chu khawtlang hruaitute'n ti tawh lo turin an lo hrilh tawh ṭhin tih sawiin, "Parent-teacher meeting-ah vawi tam tak an nungchang sim tura an ngen hnuah hmasawnna hmuh tur a awm loh avangin June 1, 2016 khan khawtlang hruaitute leh zirlai nu leh pate chuan sikulah lên chilhin, an chungah an lungawi loh thu leh sim tura an duh thu an hrilh pawhin awmzia a nei lo a, tun thlenga rûi chunga class an la lak reng avangin, inzahlohna leh zirlaite hlamchhiahnaah ngaiin bàn an nih ngei theih nan hmalak ni se tia rel a ni," a ti.

Zamuang khawtlang resolution

1. Zirtirtu mahni hna aia ruihhlo ngaihtuah leh rui chunga class la
ṭhinte hian zirlai mai bakah, Za-muang khua min zah lo hle a, an hna aṭanga bàn an nih ngei theih nan sorkarin hma la se kan ti.

2. Zirna aia ruihhlo ngai pawimawh zawk zirtirtute hi khawi hmunah mah thawk tlak an ni lo tih hi kan sorkarin hria se, sorkarin a bàn ngei kan phût tlat a ni.

3. Ruihhlo ngai zirtirtute hi thu leh awm loa báng ngei turin kan phût tlat a ni.

4. Zirtirtu zirna aia ruihhlo ngai pawi-mawh zawkte hi bàn an nih hma chuan sikula kan fanaute tan a him loh avangin, zirlaite sikul kal kan remti lo a, zirtirtu sikul kal tur dangin, zirlaite sikul kan kaltir dawn lo.