Post-a awm turin chah

MZP chuan nimin khan Reiek community hall-ah Federal Council Sitting an nei a; sorkar hnathawk, mahni post-a awm lote an post-a an awm vek theih nan hmalak an rel.

MZP meeting chuan, Zirlaite Ni, October 27 chu mumal zawka Mizoram puma hman a nih theih nana hmalak te; trade licence, ILP leh Transfer of land (hnam dangin Mizorama in hmun leh ram an neih phal lohna dan)-te dik tak leh felfai taka kalpui a nih theih nana hmalak te; Mizoram pumah a rualin ni khatah ILP enfiah rûnpui neih te; Mizoram sorkarin sorkar higher secondary school tam zawk mamawhna hmunah a din belh theih nana hmalak te; Bairabi-ah khualzin phur rêl a luh tawh avangin state páwn aṭanga lo kalte ILP uluk leh khauh taka kenkawh a nih theih nana hmalakte an rel bawk.