Project Rotling - Hmasawnna Rahbi Thar

Rural Development minister Prof. Lalnilawma chuan nimin khan MLA conference hall-ah MGNREGS hnuaia RD block 28-te inelna tur, 'Project Rotling - Hmasawnna Rahbi Thar' a tlangzarh a; project vil zuina tur portal leh MzSRLM hnuaia self help group-te hlawhtlinna lehkhabu a tlangzarh bawk.

Project Rotling - Hmasawnna Rahbi Thar hnuaiah hian short term project - kum khat chhunga thawh zawh tur, medium term project - kum 2/3 chhunga thawh zawh tur leh long term project - kum 5 chhunga thawh zawh tur a awm a; Mizorama Rural Development (RD) block 28 aṭangin concept paper 84 a lut a ni.

Concept paper-te chu district tinah project director-te'n an endik hnuah state huap expert panel-in project 27 a thlang chhuak a, chuta ṭang chuan RD Minister kaihhruai Monitoring Committee-in project 15-ah an lo thlang chhuak leh a ni. Project thlante hnenah sum hman tur first instalment chu Minister-in a sem nghal.

Prof. Lalnilawma chuan, Project Rotling - Hmasawnna Rahbi Thar chu thawhhona ṭha hnuaiah kalpui tur a nih thu sawiin, "Hmalakna thar, pilot project a nih avangin thlan chhuahte hian entawn tlaka an hlawhtlinpui ngei a ngai. Kan hlawhtlin chuan hun lo kal zel turah pawh chhunzawm a phurawm dawn a, state dangte pawhin an entawn a, an zir chian tlâka thawh a ṭul," a ti.

RD Minister chuan, "Project hi awm lo ata awm thar a ni lo a, a awm sa mumal leh ṭangkai zawka hmalakna tur niin, MGNREGS hnuaia hmalakna kal mek bakah ṭha lehzuala danglamna thlen tura ke pênna a ni," a ti a; RD block 28 aṭanga project 84 a lut thei chu lawmawm a tih thu a sawi.

Project Rotling - Hmasawnna Rahbi Thar tlangzarhnaah hian deputy govt chief whip W Chhuanawma, MLA, RD secretary R Zarzosanga, joint secretary Paul L Khuma, deputy secretary Lalvenhima leh Expert Panel member Dr James LT Thanga, MZU associate professor te pawhin thu an sawi a ni.