MCAB-in MJA hnenah computer an pe

Mizoram Cooperative Apex Bank (MCAB) chuan nimin khan MJA Public Libary-a hman turin MJA hnenah computer an pe. Apex Bank Head Office-a computer hlanna inkhawmah MCAB chairman Lalnunsanga'n MJA vice president C Lalhmachhuana hnenah a hlan a ni.

MCAB Chairman chuan, Apex Bank chu Mizo mipui ta, a hlâwkna pawh Mizo mipuite chauhin an têl a nih thu a sawi a, "Kan bank kaltlanga sum che vel reng reng Mizoram páwnah chhuak loin, state chhungah vek a vir kual a, Mizoram tana a hlutna hi mipuite'n hre thar zel se kan duh," a ti.

Lalnunsanga chuan, bank awm lohna thingtlangah mipuite'n hma an sawn theih nan Primary Agriculture Credit Cooperative Society (PACS) an kalpui thu leh khaw tam takah mipuiin an chhawr ṭangkai mek thu a sawi.

MJA vice president leh MJA Libary Sub-Committee chairman C Lalhmachhuana chuan, Apex Bank-in duhsak taka MJA tan computer full set an pe chu an lawm tak zet thu a sawi a; tun hma aṭanga MJA leh Apex Bank ten thawhhona ṭha tak an neih thu sawiin, chu chu chhunzawm zel an duh thu a sawi bawk.

MCAB Chairman sawi danin, Apex Bank hian Mizoramah branch 28, ATM booth 34 leh mobile ATM pahnih an nei mek a; kum kal mek chhungin branch thar pariat hawn an tumah pathum an hawng tawh a, panga dang hawn leh an tum. Board of Director term kal mek kum 5 chhungin branch 50 neih tlin an tum a ni.

Apex Bank hian sorkar sum kum liam ta 2023-24 chhung khan deposit cheng nuai 1,50,757.54 dawngin, loan cheng nuai 1,17,212.84 an pe chhuak a, deposit aṭanga loan an pek chhuah, credit-deposit (CD) ratio chu 77.75% a ni a, Mizorama bank zingah CD ration sang ber a ni. Kum liam ta chhung khan cheng nuai 4,246.47 an hlêp a ni.

MCAB hotute chuan, Mizoram hmun hrang hrang aṭangin bank hawn dilna an dawng nasa tih an sawi rualin, bank branch din thar chu a hautak avangin tihhlawhtlin zung zung theih a nih loh thu an sawi a; chuti chung chuan tuna branch 28 an neih mek chu kum 5 chhungin 50-ah tihpun hman an tum thu an sawi.

Computer hlanna inkhawmah hian MCAB vice chairman Lalrinchhana, director pathum - B Lalremliana, Rosiamliana Ralte leh R Lalrempuia bakah, chief executive officer A Lallungmuana leh hotu dangte an tel a; MJA aṭangin member ṭhahnem tak an tel bawk.