Tunlai mila intuai hriam a pawimawh - LESDE Minister

Industrial Training Institute (ITI), Aizawl chuan nimin khan an hmunah an kum 60 (diamond jubilee)-na an lawm a, khuallian Lalnghinglova Hmar, Labour Employment, Skill Develop­ment & Entrepreneurship (LESDE) minister chuan, tunlai khawvel mila intuai hriam zel a pawi­mawh thu a sawi.

Lalnghinglova Hmar chuan, "Sorkarah kum 60 chu pension hun, hahchawlhna hun atana hman tawh tur a nih laiin ITI erawh diamond jubilee an thleng hi hmasawn zelna atana chona ni se ka duh," a ti a; ITI-a thawkte chu hmasawn zel turin a chah.

Training chhuah hnuah pawh inzir zui zel a ngaih thu sawiin Minister chuan, "Kawng hrang hrangin, Youtube aṭangte pawha inzir belh zel tur a ni. In themthiamnate tunlai khawvel mila tuai hriam a, upgrade ve zel a ṭul. In hnathawhna hmunah in hma lam hun zel atan hmelhriat leh ṭhian ṭha siam zel ang che u," a ti.

Jubilee lawmnaah hian bialtu MLA Lalchhuanthanga, LESDE secretary Lalmalsawma Pachuau leh director Angela Zothanpuii te pawhin thu an sawi.

ITI principal Vanlalhruaia tarlan danin, ITI, Aizawl hi kum 1964-ah din a ni a; thawktu principal, vice principal leh supervisor (i.c) pakhat ṭheuh, instructional staff 28, non-teaching staff 13 an awm mek. Trade 19 a awm a, chu'ngte chu engineering trade 14 leh non-engineering trade panga a ni.

Kum 1964 - 2024 thlengin mi 5,825 an lut tawh a, mi 4,767 (82%)-te'n ṭha takin an zir chhuak tawh a ni.