Lottery tihhmasawn dan tur sawiho

Chief minister Lalduhoma, Finance minister ni bawk chuan nimin khan a pisaah Mizoram Institutional Finance & State Lottery kalpui mek dan leh tihhmasawn dan tur sorkar hotute a sawipui. Paper lottery leh online lottery kalpui kawptir tumin inbuatsaih mek a nih thu tarlan a ni.

Ṭhutkhawma tarlan danin, State Lottery Regulation Rules, 2019 angin kal mek a ni a, mamawh zat distributor an awm thei rih lo. Tun hnaiah tender chhuah ṭhin ni mahse online lottery kalpui theih a nih loh avangin chhângtu dang an awm belh rih lo a, chuvang chuan paper lottery leh online lottery kalpui dun theih tumin inbuatsaihna kalpui mek a ni.

Kum 2023 chhung khan Mizoram State Lottery-in cheng vbc. 20 an hmu chhuak a; lottery draw-na tur khawl (mechanical draw machine) an nei a, draw apiangin judge pahnih leh supervising officer-ten an en endik a, online-in a video live-a tihchhuah ṭhin a ni.

Nimina ṭhutkhawmah hian adviser to CM TBC Lalvenchhunga, secretary to CM Vanlaldina Fanai, Finance department leh Institutional Finance & State Lottery hotute an tel.