Balu laihna chimah mi pathum thi

Nimin chawhma dar 11 vel khan Champhai district-a Melbûk khaw mite'n balu an lâkna a chim a, mi pathum an thih bakah mi pakhat a hliam.

Melbuk aṭanga Vanglaini thu dawn danin, balu lakna hi ft. 60 vela sei, ft. 6 vela zau leh ft. 7 vela thûk a ni a; nimin chawhma dar 11 vel khan chimin, mi pali a chhilh a, balu leh a bul vela lung awmte'n a delh a ni.

Vanduaina thlenna hmunah hian Lalmal­sawmdawnga (16) s/o Samuela, Melbuk leh, Myanmar aṭanga rawn raltlan Laltandik (20) s/o Liankhawnang, Tahan, Myanmar-te an thi a; Lalmuankima (18) s/o Lenkhupa chu damdawi-in panpui a nih laiin a thi ve leh bawk. Lalmuankima nau a hliam a, Champhai District Hospital-ah enkawl niin, ngaih­tuahawm lutuk a ni loa sawi a ni.

Lalmalsawmdawnga leh Lalmuankima te hi nizan khan lumen an ni a, vawiinah vui an ni ang. Laltandik ruang chu nizan khan an khua panpui a ni.