Science, Maths & Environment Exhibition

State Council of Educational Research and Training (SCERT) chuan an directorate tualah State Level Science, Mathematics & Environment Exhibition and Edutech Festival vawi 42-na an huaihawt a, nimin khan School Education minister Dr Vanlalthlana'n a hawng.

Dr Vanlalthlana chuan, exhibition thupui, ‘Science & Technology for Society’ tih chu a taka hman ṭangkai a ṭul thu sawi a, "Thiamna hmang thiam leh hmang ṭangkai hmasatu nih a pawimawh. Khawvela sumdawnna lian ber ber zinga a tam zawk chu technology behchhan sumdawnnate a ni a, hmasawnna hna kalpui dawn chuan hmasawnna awmze nei, inkhairual leh hun lo la awm tur ngaihtuah chunga ruahmanna siam a pawimawh," a ti.

Technology thar hman ṭangkai nachang hre lo company lian tak takte an tlûkchhiat phah tih sawiin Minister chuan, "Khawvelin a buaipui mek artificial intelligence (AI) pawh kan luhchilh a, kan zir chian a, hman ṭangkai kan tum ve a pawimawh," a ti a; ram dangte ruala hmasawnna kawng zawh turin ṭhalaite'n science leh technology thiamnate an chhawr thiam a ṭul thu a sawi.

Science, Mathematics & Environment Exhibition and Edutech Festival 2024-ah hian district panga aṭangin sikul 13 telin, model/exhibit 43 an pho chhuak. Exhibit 43-te chu uluk taka endik an nih hnuah national level exhibition-a tel tur thlan a ni ang. EduTech Festival atan stall 10 hawn a ni bawk.