Lengpui Airport-a hnathawh endik

Mizoram State Project Monitoring Committee (MSPMC) chuan June 26, Nilaini khan vice chairman R Lal Rinawma hoin Lengpui Airport tihchangtlun hna thawh mek an tlawh a, a hmaa ṭum hnih an tlawh tawha hna kalpui dan chungchanga rawtna an siamte bawhzui a nih leh nih loh an enfiah.

MSPMC hian Improvement & Upgradation of Facilities at Lengpui Airport hnathawh kal mek hi April 22, 2024 leh June 6, 2024 khan an tlawh tawh a; an thil hmuh dan leh siamṭhat ngaite chu MSPMC General Body Meeting-a an sawiho hnuah rawtna eng emaw zat siamin, a mawhphurtu department-ah an thlen a ni.

Lengpui Airport tihchangtlun hna thawh mek June 26-a an endiknaah hian MSPMC member-te chuan contractor-te'n hna an thawk chak lo niin an hria a, chak zawka thawh a nih theih dan tur leh hna hrang hrangte thawhho dan tur an sawipui a ni.