KHAWTHLIR

MNF-in lawmpui

MNF chuan thuchhuah siamin, AMC Ward-XIX by-election-a thlan tlin tak ZPM candidate Dr C Malsawmtluangi an lawmpui thu an tarlang a, bial chhung hmasawn nan theitawp chhuaha thawk turin duhsakna an hlan. An candidate Dr Lalrinzuali Hrahsel chungah te, a tlin theihna tura theihtawp chhuahtute leh amah vote-tute chungah an lawm thu an tarlang bawk.

Meizial zu man

Aizawl District Anti Tobacco Squad chuan nimin khan Aizawl New Market-ah phal lohna hmuna meizial zu an awm leh awm loh an endik a, dan bawhchhiaa mei zu mi pakua manin, pawisa an chawitir. Endiknaah hian National Tobacco Control Programme, Indian Society on Tobacco and Health, Mizoram leh New Market enkawltu Commerce & Industry aiawhte an tel a ni.

Tuitla ruang hmu

June 25, Thawhlehni tlai dar 3:30 vela Ṭlui luia chesual Malsawmtluanga (22) s/o B Lalawmpuia (L), Champhai Dinthar Veng chu nimin chhun dar 1 vel khan Ṭiau luia Kelkang Ngawi Li-ah hmuh a ni a, nimin khan vui nghal a ni. Malsawmtluanga hi hna a thawk zo Ṭiau luia insil a tumna lamah chesualin tuiah a tla hlum a ni.

Laptop hlan

Aizawl East-I bialtu MLA Lalthansanga, minister chuan nimin khan a bial chhunga kumin HSSLC exam-a top 10-a langte chawimawina hun a pisaah a buatsaih a, lawmpui nan laptop a hlan. Minister-in laptop a pekte chu HSSLC Science-a pathumna Muhammad Aatif Nazir, Commerce-a palina Andres Lalrinawma leh 10-na Lalruatpuia te an ni.

Exam centre hawng

Saitual DC Dr Lalngura Tlau chuan nimin khan Saitual Higher Secondary School-a Mizoram Public Service Commission (MPSC) Combined Competitive Examination Centre thar a hawng. Exam centre tharah hian nimin khan competitive exam neih nghal a ni.