NDA-in Mizoram min duhsak - Chief Minister

Chief minister Lal Thanhawla chuan, sorkar laipuia BJP kaihhruai National Democratics Alliance (NDA)-in Mizoram a duhsak niin a sawi a, "Hna thawh ṭha chu eng sorkar pawhin an duhsak zel ang," a ti.

Chief Minister hian nimin khan Congress Bhavan-ah thu sawiin, "UPA sorkar khan min duhsak an tum hle a, kan dawngsawng ṭha thiam lo lek lek zawk a ni. UPA ai khan NDA-in min duhsak zawk em aw tih ka ngaihtuah," a ti a; sorkar laipui
aṭanga duhsakna lo kalte a
ṭangkai zawk theihna atan official-te'n a dawn thlêng an siam thiam a ngaih thu a sawi.

Sorkar laipuiah tu pawh sorkar se, mi dik leh hnathawh ṭha an duh tih sawiin Lal Thanhawla chuan, "Hnathawk ṭha leh dikte chu tumahin an hawisan thei lo. State tê zinga thawk ṭha ber kan nih reng chuan tumahin min duhsak lo thei lo ang," a ti.

CM Hawla chuan, Mizoram a intodelh theihna turin a kaihhruai sorkarin theihtawp an chhuah tih sawiin, "Programme hrang hrang duan a ni a, kuttlingloa sum lak tumna vangin harsatna a awm a ni," a ti a; kuttlingloa sum lak tumte'n Kaladan Multi Modal Transit Transport Project kawng siam hna thawktute an dan mek thu a sawi.

Kuttlingloa sum lak tumna awm ṭhin chu tihtawp a nih loh chuan Mizoramin a neih tur ang a neih theih loh a hlauhawm tih sawiin Chief Minister chuan, "Malsawmna dawng tur chuan a dawng tlaka kan awm a ngai. Hetiang harsatna hi a reh theihna atan ṭawngṭaina nen ṭan lak a ngai a ni," a ti.

Ration card dik lo chungchang sawiin Lal Thanhawla chuan, "MNF ṭhalaite'n ration card an hâl kha sorkar tihmualpho tum vang a ni. Buhfai harsat chungchangah mipui an phun lo a, an phun a nih chuan an phun lohna atan hmalak tur a ni," a ti a; ration card dik loh vangin com-plaint a la dawn loh thu a sawi.