Minister-in theihtawpa zir turin zirlaite fuih

Minister Zodintluanga chuan, tunlai ṭhalaite'n ngaihsan tur dik tak an ngaihsan a hun tawh hle tih sawiin, zirlaite chu theihtawp chhuaha lehkha zir turin a chah.

Zodintluanga hian nimina Ramhlun Indoor Stadium-a St. Joseph Higher Secondary School-in kumin HSLC leh HSSLC result an lawmnaah thu sawiin, zirlaite chu an lehkha zirnaah theihtawp chhuah turin a fuih a, "Thil dang intlansiaknaa kal loin, zirlaiah theihtawp chhuah rawh u. Ṭhalai kalsual tam tak an awm a, khawlaia vâk mai maite hi hero angin ṭhalaiten kan en lo, mi awhawm an ni lo," a ti.

Mizote khawtlang nunah hma-sawnna tur tam tak a awm thu sawiin, Zodintluanga chuan, "Korean sam tih ang apianga tiha kal vel hi a ni tawh lo a, khawlaia bike chak tak taka tlân nihte leh hmeichhe scooty nei léng mai maite hi an ngaihsanawm loh," a ti a; Mizorama hming lang thama taima leh tumruhte ngaihsan tur an nih thu a sawi.

HSLC leh HSSLC chhuakte chu an zirnaah uniform an hâk loh hun a thleng dawn tih sawiin, "Chutih hunah chuan zirlaite chu anmahni kut ngeiah an la innghat dawn. Chutiang bawkin in kutah ram a la innghat dawn bawk," a ti.

Khualzahawm Lalnghinglova Hmar, Vanglaini joint editor pawhin fuihna thu sawiin, hna hmu turin mi thiam bik nih a ngaih tawh thu a sawi a; zirlaite chu inkhel leh TV serial chauh ngaihtuah lo a, zirna ngaihsak tur leh lehkhabu chhiar tam turin a fuih.

St. Joseph HSS hian kumin HSLC-ah 100% result an nei a, HSSLC Arts leh Commerce-ah 100% result an nei bawk.