Traffic police thu awih turin ngen

Traffic SP chuan thuchhuah siamin, Rangvamuala lei tawlh ṭhin thenfai hna chu tlai dar 3 aṭanga dar 6 thleng thawh ṭhin a nih thu a tarlang a; hei vang hian traffic police leh hnathawktute thu ṭha taka awih turin mi tin a ngen.

Traffic SP chuan, "Tunlai fûr ruahsur ṭhin vangin hmun hrang hrangah lei min/tawlh avangin inkalpawhna a tlang ṭhat loh cháng a awm ṭhin a; a bik takin, Sairang lam leh Lengpui Airport lam pan turte chu Rangvamuala leimin ṭhin avangin kaltlang theih loh cháng a awm ṭhin," a ti a; mahni thu thua kal mai loin, kawng dinhmun hre chiang hmasa turin a chah a ni.

Kawng dinhmun hre chiang tura biak pawh theihnate chu - Traffic Control Room telephone no. 0389-2322307, Traffic deputy SP mobile phone no. 8974241998 leh Traffic OC mobile phone no. 9862376929-te a ni.

Aizawl aṭanga Kawn-pui lama kal tumte chu Sairang lamah kal kher loin, Durtlang-Lungdai kawng lama kal nghal mai ṭhin turin Traffic SP chuan mipuite a hriattir bawk.