MPC-in Bairabi HEP tharthawh an tum

MPC president Lalhmangaiha Sailo chuan, MPC party-in sorkarna a siam veleh Bairabi Hydel Project hluihlâwn tawh chu an tharthawh leh dawn tih a sawi.

Nimina an party pi-saa inkhawmah thu sawiin, Lalhmangaiha Sailo chuan, "Kan sorkar leh veleh Bairaibi HEP kan chhunzawm ang a, kawlphetha chakna hmangin industry leh factory tam tak kan din ang a, thiamna nei leh thiamna nei lo, ṭhangtharte'n hna harsa loin an hmu zel thei dawn. Hna ṭha leh hlâwk, mi tam berin an duh zawk tur phei chu mahnia enzawn (self employment) lam a ni ang," a ti.

MPC President chuan, Bairabi HEP an tihpuitlin chuan Mizorama hman turin kawlphetha megawatt 160 dah ni ta se, a dang megawatt 100 chu state pawnah hralh theih a nih dawn avangin, Mizoram tan zu zawrh aia sum hnár ṭha zawk a nih tur thu a sawi.

MPC a sorkar chuan rél kawng leh lui dunga lawng kawng a inzawm dawn tih sawiin, "Chu chuan bungraw tinreng Zorama lak luhna kal man a titlahniam ang a, sumdawngin hlép chhe chuang si loin dawrah mi zawng zawng tan thil a tlàwm phah ang. Chhung tin tan khawsak a tiawlsam dawn a ni," a ti a; Mizorama thil thar chhuah hralh kawngah pawh a hlawk zawk tur thu a sawi.

Lalhmangaiha Sailo chuan, Bairabi HEP tihpuitlin a nih chuan industry tam tak a ding dawn tih sawiin, "Kan ram thing leh maute paper mill leh plywood factory-ah kan barh thei ang a, a hlâwkna kan tél tawh ang. Mi ram pawisa tam tak kan la lut ve tawh dawn a ni," a ti a; Bairabi HEP tihpuitlin chu Mizoram hmasawnna kawng hnai niin a sawi bawk.