Ex-servicemen-in Larsap an chawimawi

Mizoram Ex-Servicemen League chuan, nimin khan an pisaah Governor Lt.Gen. Nirbhay Sharma-a'n D.Litt. degree a dawn lawmpuina leh chawimawina hun an buatsaih.

Larsap chuan, ram leh khaw-tlang siamṭhat kawngah ex-service-men-te'n mawhphurhna leh tih tur tam tak an nei tih sawiin, "Ex-servicemen-te hi mahni inthunun thei leh invawng uluk, India ram tana mi rinawm leh ram leh hnam inpumkhatna ngai pawimawhtu an nih avangin mi dangte tana entawn tur tam tak an nunah a awm," a ti a; ex-servicemen-te chu khawtlang tana an theihnate hmang zel turin a chah.

Ex-servicemen-te lawmpuina chu thinlung taka a lawm thu sawiin Lt.Gen. Nirbhay Sharma chuan, "Kum 1963 aṭanga India ram tana ka feh chhuah aṭangin India ram state zawng zawng deuh thawah ex-servicemen-te ka kâwm tawh a, Mizorama ex-servicemen-te tluka nêlawm leh min titlángnél thiam ka la tawng lo," a ti.

Governor chuan, Mizo ṭha-laite chu an rilru sûkthlêk leh an khawhawi tizau a, India ram chhungril zawk luhchhuak ngam tura a duh thu sawiin, "Inrintawkna min pe tur chuan a bik takin Hindi ṭawng thiam a pawimawh," a ti a; 10 Assam Rifles leh YMA sub-headquarters, Serchhip ṭangkawpin Hindi tawng zirna an buatsaih chu thil chhinchhiahtlak a nih thu a sawi.

Governor Lt.Gen. Nirbhay Sharma hi Shri JJT University, Mumbai-in May thla khan India ram leh mipuite tana a hnathawh ṭhat vangin Doctor of Letters (D.Litt.) degree an hlan a ni.