KHAWTHLIR

NLUP bawng an duhthlan

Serkhan leh Lungdaia NLUP hnuaia bawng vulh thlangtute chuan thuchhuah siamin, an bawng dawnte chu an duh taka an thlan niin an tarlang a, "AH&Vety Minister hmalaknain Vety doctor kaihhruaina hnuaiah Shillong aṭangin kan la a, kan duh ang kan thlan hnuah an hriselna dinhmun enfiah vek a ni. Mizorama phurh luhna kawngah bawng vulhtute buaipui turin VFA tirh an ni," an ti.

Current man hlum

June 9, 2016 khan Ramzauva (46) s/o Laldawla (L), Samtlang, chu an khuaa Mizoram UPC kohhran biak-in an saknaah electric current-in a man hlum. Thu dawn danin, an hnatlannaah hian dár khaina tur an siam a, biak-in chunga electric line chu a hniam avanga mau roa do kàn a tumna lamah Lalramzauva hian electric hrui a tawng palh a ni.

Milk cooler hawng

MULCO-in Lungdai Milk Producers’ Cooperative Society-te hman tura an sak, bawnghnute dahkhawlna ‘Bulk Milk Cooler’ chu Ningani khan Cooperation minister Lalrinmawia Ralte-in a hawng. Bulk Milk Cooler hi Indian Dairy Machinery, Gujarat siam a ni a, bawnghnute litre 1,000 leng a ni.

GSM inkhawmpui

Geology Society of Mizoram (GSM) chuan, nimin khan Pachunga University College seminar hall-ah General Body Meeting an nei a; leimin vên kawngah leh in sak dan him zawk neih a nih theih nan Aizawl Municipal Council nena thawhho dan kawng zawn an rel. 'Natural Resources in Mizoram' tih thupui leh 'Landslides in Mizoram' tih thupui an zirho nghal a ni.

MPC consultant

MPC-te chuan nimin-a an party pisaa inkhawmah executive member-te'n MPC party consultant tur mi pali an thlang a; KL Lianchia, C Lalsawivunga, Dr B Thangdailova leh Lalzabiaka te an thlang.