Lawngtlai district-a hnathawhte ṭha tâwk lo

Lawngtlai District Level Vigilance & Monitoring Committee chu Ningani khan chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin DC conference hall-ah an ṭhu khawm a; sorkar laipui report-ah Lawngtlai district-a hna thawhte a ṭhat tawk loh tarlan a nih thu sawi a ni.

CL Ruala chuan, sorkar laipui report-a a lan danin, sorkar laipui scheme hnuaia Lawngtlai district-ah hna a ṭha lo hle tih a sawi a, "Hmasawnna hna hrang hrang enkawltute’n ṭan lak a ngai hle a ni," a ti.

Ronald Sapa Tlau pawhin, ṭha taka hna thawk thei tur chuan sorkar hna thawk, tlawmngai pawlte leh mipuite inkarah thawhhona
ṭha neih a ṭul thu a sawi.

Meeting-a tarlan danin, tun dinhmunah PHE department hnuaia National Rural Drinking Water Programme (NRDWP)-ah Lunghauka, Dumzautlang leh Boraituli-ahte tui lak hna thawh mek a ni a; Swachh Bharat Mission (Gramin) hnuaiah ek-in 492 sak zawh tawh niin, sak mek 57 a awm.

PWD hnuaia Pradhan Mantri Gram Sadak Yojana (PMGSY) kaltlangin kawng panga (km. 40 chuang)-ah hna hrang hrang thawh mek a ni a, sum lam harsatna vang-in duh angin hna an thawk chak thei lo.

Social Welfare department hnuaia National Social Assistance Programme (NSAP) kaltlangin tar pension (IGNOAPS), hmeithai pension (IGNWPS) leh rualbanlo pension (IGNDPS)-te kalpui mek a ni a; a theih ang angin a mamawhtute tuam kim zawk tura hmalak mek zel a ni.

Border Area Development Programme (BADP) hnuaiah Lawngtlai district chhungah hna kal mek 30 a awm a, Backward Region Grant Fund (BRGF) hnuaiah hna thawh zawh tawh 307, thawh mek paruk leh thawh hmabak pakhat a awm.