Grape chíngtute harsatna tawh enfiah

Horticulture minister PC Lalthanliana chuan Ningani khan Hnahlan khua a tlawh a, grape chíngtute harsatna a hmun-ah enfiahin, a sutkian dan tur a sawipui nghal.

PC Lalthanliana chuan, Hnahlana grape chíngtute harsatna tawh mek chu Chief Minister-in a ngaih pawimawh thu a sawi a, "Hnahlan ka rawn tlawh chhan ber chu CM leh bialtu MLA duh dan anga in harsatna ngaihthlaksak tur leh a sutkian dan dappui turin a ni. Sorkar hmalak tum dan puan mai tur ka nei rih lo a, CM hnenah report ka thehlut ang," a ti.

Horticulture Minister sawi danin, Mizoram hi India rama state pachhe ber zinga mi a ni chungin, lo neitute tana sum sêng tam ber pakhat a ni reng a, sorkar chu a ti ṭha peih-te ṭan-pui turin a inpeih reng a ni.

PC Lalthanliana hian Hnahlan Grape Grower Society Winery a tlawh nghal a, society member-te'n an harsatna hrang hrangte an lo hrilh. Hnahlan GGS hruaitute chuan, department hrang hrang huapa ruahmanna siampui tur leh Ministry of Agriculture hmalakna pakhat, Market Intervention Scheme aṭanga grape chíngtute harsatna chhawmdawl a nih theih nana hmalakpui turin an ngen.

Hnahlanah hian in 700 vel awmin, chung zinga in 500 vel chu grape huan neia eizawng an ni a, kum khatah grape quintal 5,000-7,000 vel an thar ṭhin a ni.