Hnam sipaite hmusit zawngin Thu ka sawi ngai lo - Hawla

MPCC president Lal Thanhawla chuan, engtik lai mahin hnam sipaite hmusit zawnga thu a sawi ngai loh thu a sawi. Ex-MNA Association chuan Lal Thanhawla chu hnam sipai hmusit zawnga thu sawi ṭhinah an puh a ni.

Nimina Congress Bhavan-a thu a sawinaah Lal Thanhawla chuan, hnam sipaite chuan ram hmangaihna vangin an ram maichâmah an nunna an thàp tih a sawi a, "Bum chhuah an nih avangin hnam sipaite'n indepen-dence an sual tak tak a, ram tana nunna hlânte kha martar an ni. Bum chhuaktute lakah chuan an dinhmun hi sang tak a ni," a ti.

Hnam sipai bum chhuak a, sorkarna an chan laia ngaihsak leh si lote chu ṭha lo a tih thu sawiin Lal Thanhawla chuan, "Hnam sipaite hmanga inawih nun tum ho hi tenawm ka tihte chu an ni," a ti a; MNF a tihte chu hnam sipaite ni loin, bum chhuaktu political leader-te an nih thu a sawi.

MPCC President chuan, hnam sipaite chu an zahawm thu sawiin, "Kan hnam sipaite an rawn haw chhuah hlim khan an pawisa dawn tur kan sawi chhuahsak a, chu pawh an hotute’n an la pe kim ṭha duh lo. Congress-in sorkarna kan chan hnuah Maumualah in hmunte kan pe a ni," a ti.