Kolasib-ah Education Campaign neih a ni

Nimin khan Kolasib Diakkawn YMA Hall-ah Education Campaign buatsaih a ni a; khuallian H Rohluna, School Education minister chuan, zirnain hma a sawn dawn chuan zirtirtute'n ṭhahnemngai taka an thawh a ngaih thu a sawi.

School Education Minister chuan, zir-tir-tute'n ṭhahnemngai taka hna an thawh loh chuan de--partment aṭangin eng ang pawhin hma lak ni mah se, a ṭangkai tak tak thei lo tih a sawi a, "Zirtir hna hi hna zahawma a ni a, khawtlangah pawh mi zahawm an la ni reng. Zirtirtu ṭhenkhat nung-chang mawi lo vang-in khaw-tlang hmai an tibâl fo ṭhin," a ti.

Naupang enkawlna chu inpekna tak tak tel lo chuan a hlawhtling thei tak tak lo tih sawiin H Rohluna chuan, "Hmangaih taka enkawl leh zirtir an nih leh nih loh naupangte'n an hre ṭhin. Naupang ze inang lo pui pui, chhungkaw inang lo tak tak aṭanga kal an ni a, chu'ng mite chu an dinhmun azir zela enkawl hi kan mawhphurhna a ni," a ti a; zirtirtute chu
ṭhahnemngai taka thawk zel turin a fuih.

School Education Minister chuan, zirtirtu hna chu a duh nazawngin thawh theih a ni lo tih sawiin, "Proffessional job, noble job a ni a, thiamna a takin naupangteah lo lantir rawh u. Inthlahdah loin hma ila thar ang u. Khawvel hmasawnna chak takah kan awm mek a, zirtirtute pawh kan in update ve reng a ngai a, kan in update ve reng loh chuan naupangte'n an tuar ang," a ti.

Education Campaign-ah hian Kolasib district chhunga zirtirtute an tel a; parliamentary secretary (School Education) Joseph Lalhimpuia leh Kolasib DC H Lalengmawia te pawhin thu an sawi.