Green Mizoram Day hmang Ramsa leh sava suat chíngte chu an phû anga hrem an ngai - CM

Green Mizoram Day 2016 chu Inrinni khan Thenzawl Joint YMA hall-ah chief minister Lal Thanhawla'n a hawng. Chief Minister chuan, ramsa leh sava suat chíngte chu an phû anga hrem ngei a pawimawh thu a sawi.

Chief Minister chuan, Mizoramin industry lian nei lo mah se, lirthei a tam tawh avangin lirthei khûte'n boruak chhia an tichhuak a, hriselnate a nghawng tih a sawi a, "Thing phun kan uar a, kan enkawl zui hian boruak kan tihthianghlim mai bakah, kan hriselna atan thil ṭha kan ti tel a ni," a ti.

YMA leh khawtlangin theih-tawp chhuaha nungcha an humhalh laiin mi ṭhenkhat, kuthleite'n ramsa leh sava an veh leh an suat ṭhin chu a vanduaithlak a tih thu sawiin CM Hawla chuan, "Hetiang tih ching hi sorkar leh khawtlangin kan zuah loh a pawimawh," a ti a; ramsa leh sava suat chíngte chu an pawi khawih phû tawk ang hremna an hmuh ngei theihna atan ṭan tlan a ṭul thu a sawi.

Lal Thanhawla chuan, thing leh maute chu Pathian siam an nih angin duat leh dimdawi taka enkawl chu mihringte tih tur dik tak a nih thu sawiin, "Chhuan lo kal zel turte hmakhua ngaihtuahin leh an ânchhia min lawh loh nan thing phun kan uar a, kan phun sate an dam chhuah theih nan theihtawpa enkawl leh vil zui hi kan tih tur dik tak, kan zavaia mawhphurhna lian tak a ni," a ti.

Khualzahawm Environment, Forests & Climate Change minis-ter Lalrinmawia Ralte chuan, hmun kilkhâwr leh khaw tê zawkte'n kawng sira thing phun lian leh nung ṭha tak tak an neih lai a, khawpui zawka thing phunte a thi duh bik chu ngaihtuah chian a ngaih thu a sawi a, "A enkawl zuina lamah ṭan kan lak a ngai a ni," a ti a, thing phuna Mizoram tihhrin belh zel a ni chu lawmawm a tih thu a sawi.

Green Mizoram Day hawn-naah hian minister of state C Ngunlianchunga leh Dr BD Chakma, parliamentary se-cretary K Lalrinthanga leh Joseph Lalhimpuia, MLA Vanlalawmpuii Chawngthu, chief secretary Lalmalsawma leh DGP Thianghlima Pachuau te pawh an tel. Hawnna inkhawm zawhah VIP-te'n Thenzawla AH & Vety Complex-ah thing an phun a ni.

Kumin Green Mizoram Day hi a ṭum 17-na a ni a, kumin thupui atan 'Thing phun la, boruak thianghlim siam rawh' tih a ni. Day pual hian Mizoram hmun hrang hrangah thing ṭiak nuai 44 chuang phun a ni tawh.

Environment, Forests & Climate Change department tarlan danin, Mizoramah ram ngaw 'forest area' square km. 4,483.29 a awm a, field staff 493 an awm. Department-in a chhût danin, reserve forest bikah chuan staff pakhatin square km. 9.42-a zau an enkawl leh an vil a ngai.

Nikum khan Mizoram pumah ram kâng 2,468 awmin, chu'ng zinga 2,351 chu lo hâl vanga thleng a ni a, lo hâlin ram a tihchhiat chu hectare 3,554.65-a zau a ni.

Kuminah hian ram kâng a tlahniam a, ram kâng 1,625 thlengin, chu'ng zinga 1,323 chu lo hâl vanga thleng a ni a, ram tihchhiat chu hectare 4,171.09 vela zaua chhût a ni.