Saiha leh Lawngtlai dist-ah nausen thi a tlahniam

Mizorama nausen thi tamna - Saiha district leh Lawngtlai district-ah sorkar, tlawmngai pawl leh mipuite ṭan lakna vangin nausen thihnain ziaawm lam a pan zel.

Kum nga liam ta chhunga nausen thi chhinchhiahnaa a lan danin, kum 2015-16 chhung kha district pahniha nausen thihna a tlakhniam nasat ber
ṭum a ni ve ve.

Kum 2011-2016 chhungin nausen thi tamna ber Saiha district-ah nausen 359 an thi a, Mizoram district dang nena khaikhinin a sang fál hle. Kum 2014-15 chhungah ringawt nausen thi 113 an awm a, kum nga chhunga district zawng zawng record enin, kum khata nausen thi an tam ber ṭum a ni.

Sorkar hmalakna te, Saiha CMO, tlawmngai pawl, ASHA leh mi ṭhahnemngaite ṭan lakna vangin kum 2015-16 ah chuan nausen thi zat hi 40-ah a tlahniam a; kum nga chhunga Saiha district-a nausen thi an tlem ber ṭum a ni.

Document-a a lan danin, nausen thi zat tehna, Infant Mortality Rate (IMR) tihniam tur hian kum kum nga chhung, 2011-2016 inkar khan cheng nuai 6,639.58 hmuh a ni a; Mizoram sorkar chuan Health department hnenah cheng nuai 4,574.58 a hlan tawh.

Saiha CMO Dr HT Phosa chuan, sorkarin IMR tihniam tura ṭan a lak nasat avangin tun hmaa doctor awm ngai lohna damdawi-in (PHC)-ah pawh doctor an awm vek tawh tih sawiin, "Kum kal ta aṭang khan gynecologist (hmeichhe lam specialist) leh paedetrician (naupang specialist)-te pawh an awm tawh a ni," a ti.

Saiha CMO sawi danin, damdawi-ina nau neite an chhuah hnuah Incentive Post Natal Care chu an chhuah aṭanga ni sarihna, ni 30-na leh ni 60-naah nu leh naute chu an endik leh ṭhin an ni a; nute hnenah lawmman Rs. 600 pek niin, chu chu Mizoram puma tih thar a ni.

Lawngtlai district-ah chuan kum nga chhungin nausen 149 an thi a, kum 2013-14 aṭangin nausen thi zat a tlahniam zel. Kum 2013- 14-ah nausen 35, kum 2014-15-ah 33 leh kum 2015-16-ah 22 an thi.

Lawngtlai chief medical officer Dr HC Thangkima chuan, IMR tihniam tura ṭan an laknain rah ṭha a chhuah zel tih a sawi a. A sawi danin, nuin nau a neih hma aṭangin damdawi ei tur bik an chawh a, nau neih hma thla 3/4 vel aṭangin an enkawl ṭan a, nu nau paite chu kuhva ei lo tur te, zûk leh hmuam ti lo turtein an ngen a, nuho pawhin an zâwm ṭha viau niin a sawi bawk.

Kum 2011-12 - 2015-16

Chhunga nausen thi zat

District Thi zat

Aizawl East 145

Aizawl West 112

Lunglei 150

Saiha 359

Lawngtlai 149

Serchhip 185

Champhai 147

Kolasib 147

Mamit 100