CYMA-in April 2016 hnuah gas bûr 265 man tawh

Central YMA chuan kumin April 15 aṭanga June 7 inkar khan Mualkhang leh a chhehvelah ei-rawngbawlna gas khawih chingpen an enfiahnaah gas tihchingpen bur 265 an man a; gas khawih chingpenna hmanrua 'gun' an tih chu an man nual bawk.

CYMA hruaitute chuan Sairang leh Kawnpui inkara Mualkhang leh a chhehvelah gas khawih chingpen a ni ṭhin tih hriain, tun hnai khan gas phur truck-te an enfiah ṭhin.

April 15 khan gas bur ruak 15 an man a, May 28-ah gas bur ruak 231 an man leh a, June 7 zana media-te nen an enfiahnaah bûr 24 an man belh. Gas khawih chingpenna atana hman gas bûr ruak leh gun an mansakte chu CYMA Office-ah an dah.

CYMA leh media-te hmalakna chu Food, Civil Supplies & Consu-mer Affairs department chuan bawhzuiin, director Lalramnghaka chuan tunkar aṭangin duty insiamin, chawlhkar tin an enfiah ziah tur thu leh, CYMA leh media hmalakna chu lawmawm a tih thu Vanglaini a hrilh.

Hetih lai hian, tun hma
aṭanga gas tihchingpen lo chhui tawh chanchinbumi ṭhenkhat chuan gas khawih chingpen tireh tur chuan nasa zawka mipui leh sorkarin ṭan a lak a ngaih thu an sawi.

CYMA vice president Vanlal-ruata chuan, mipuiin gas an lâk dawnah bûktir ngei se an duh thu tih sawiin, "Local council pawh mipui tana ding an ni ta sa sa a, gas kan lak hian bûktir se, a harsa a nih chuan YMA pawhin kan puih theih kan ring," a ti.

Vanlalruata chuan, "Gas khawih chingpen hi mipuiin an tuar nasa hle a. Khawpuiah phei chuan gas kan hman vek tawh avangin gas kan mamawhna a nasa hle. Gas khawih chingpen a nasa tih kan hriat avangin zir chian kan tum mek laiin kan tum aia hmain hmalak a ngai ta a ni," a ti a; gas bûr an mante chu engtin nge an tih dawn tih an la hriat loh thu leh CEC-ah an la sawiho tur thu a sawi.

Mi ṭhenkhatin gas bûrah tui a awm nia an sawi ṭhin chu a tam lutuk loa an hriat thu sawiin, Vanlalruata chuan, tuna gas khawih chingpen nasa lutuk vang hian IOC lam an biak tawh thu leh IOC lam chuan a chhîn khawih chingpen theih loh temper proof hman an tum mek thu a sawi a, "Gas khawih chingpenna hi a tâwp ngei ngei tur a ni tih hi YMA ngaihdan a ni," a ti.

June 7, 2016 zana CYMA leh media-te'n an enfiahnaa gas phurtu an man leh mi ang an kawmte
aṭangin, Sairang Dinthara chhungkaw pakhat chuan gas bûr an khawih chingpen nasa tih hriat a ni a, anmahni pawhin an pha lo. "Tun hma chuan kan khawih chingpen nasa a, tunah chuan kan chíng ngai tawh lo," tiin an sawi.

An in kawta gas phur truck an endik lai pawhin anmahni chu man lo turin an lo ngen a; chutih laiin, an in chhung sir kil khatah gas bûr ruak a awm nual bakah, driver-te nen inthu-rualin an la ti reng nia sawi a ni bawk.

Gas tihchingpen dan

Mualkhang leh a chhehvela gas khawih chingpentute hman-rua ber thîr tlâwn, pencil chen vela sei 'gun' tia an sawi chu driver-te'n an kawl deuh vek. Gun hi Mualkhang Gas Bottling Plant-ah an hotu lian zawkte hriat lohin thawktute'n an siam a, pakhat Rs. 350 ten an hralh
ṭhin. Gas bûr ruak leh a khat chu a tlua dahin, gun hmangin an hîp chhuak ṭhin a ni.

Gas bûr khat aṭangin tlem tê tê ṭheuh la chhuakin, bur paruk aṭangin gas bur ruak pakhat an tikhat
ṭhin nin an sawi.

Truck lian pakhatin gas bûr 306 zel an phur a, bur 306
aṭangin gas bûr ruak 51 an tikhat ṭhin tihna a ni. Gas bur pakhat Aizawla hralhna rate Rs. 700-a chawh rualin, bûr 51 chu Rs. 35,700 man a ni a; gas vawi khat phurhah hei hi an hlawh thei.

Gas tichingpentute zinga mi ṭhenkhat chuan, "Driver fing deuh tan chuah hausakpui loh chi a ni lo," an ti a; chutih laiin, Truck pakhata gas bûr 306 chu an khawih chingpen vek lem lo niin an sawi. Mi ṭhenkhat chuan Rs. 10,000 te, Rs. 6,000 te hlawh cháng an nei tih an sawi bawk.

Mualkhang Gas Bottling Plant leh Sairang inkarah an khawih chingpen tlangpui a, truck lian 120 vel a tlân ṭhin a, chutiang a nih chuan cheng nuai 20/30 vel man an khawih chingpen ṭhina thu dawn a ni.

Gas khawih chingpentu zinga langsar tak chu hnam dang, Das-a tia hriat a ni a, a nupui chu Mizo a ni. Anni hi Mualkhang Gas Bottling Plant bulah an awm a, an chenna in pawh lei in, holam tak a ni. Mahse, hun rei tak gas an khawih chingpen tawh avangin an hausa hle a; tunah hian truck leh maxicab pakhat an nei niin an sawi. An motor-te chu an in kawtah an dah a ni.

June 7 zana CYMA leh media-te'n an enfiah ṭumah pawh Das-a te inah chuan gas bûr ruak 24 an man a, chu'ng zinga pali chu a bûr lian chi (commercial cylinder) a ni. Das-a nupui chuan, gas khawih ching-pennaah an inhnamhnawih ngei tih a phat loh thu a sawi bakah, ṭum khat an khawih ṭuma an pawisa hlawh chhuah zatte pawh a sawi a ni.

Media-te hnathawh

Sairang leh Kawnpui inkara gas khawih chingpen chungchang hi media lamin an lo chhui tawh ṭhin. DDK news stringer Lalnunzira chuan, "Kum 2009 vel aṭang khan kan chhui tawh a, zanahte kan kal a; kan hmuh chian chu kawng sirah an lo khawih lai a ni a, hemi
ṭum hian an tlânchhia a, an tih ang chiahin kan tihtir a, thlate kan la. Tichhuak lo turin Rs. 20,000 min pek an tum a, kan duh lo a, an khawih chingpenna hmanrua hi Legal Metrology-ah kan pe a ni," a ti.

Lalnunzira chuan, tun hma aṭangin sorkarin thu a chhuah a, mahse, a bawhzui ṭha leh si lo tih sawiin, "Police leh Supply department thawhhona a ṭha tawk loin ka hria. Legal Metrology pawh hian hma la ṭhin mah se, an indaih loh thu an sawi ṭhin. Agent-te hnena a thlen pawhin a bûk a tlin leh tlin loh an chiang tawh si lo a, mipuiin kan tawrhna hi a rei tawh a ni," a ti. Nagaland-a an tih angin Mizoram sorkarin coordination committee din se a duh thu te, gas khawih chingpentute chu vawi hnih khat man an nih lai chuan tawmim deuh mah se, bawhzui reng an ngaih avangin an inlâr leh ṭhin thute a sawi bawk.

ZONET Cable TV news reporter Josept Lalnuntluanga chuan, gas khawih chingpen chungchang chu hun rei tak aṭangin media-te'n an lo bawhzui tawh thu sawiin, motor-te man chawia hmangin chhunah leh zanah Mualkhang leh a chhehvel an enfiah ṭhin thu a sawi a, "Legal Metrology hi tichak zual se a ṭhain ka hria," a ti.

Joseph Lalnuntluanga chuan, kawngpui dungah hotel-a châwl anga awm a, zalen taka gas khawih chingpen mai ṭhinte pawh an awm fo niin a sawi a; black-a gas zuar an tam thu leh, chu'ng mite chuan maruti van an neih avangin an duh duhin an tlan kual ṭhin niin a sawi bawk.