KHAWTHLIR

Thisen pe

Inrinni khan kumin YMA Day pualin Maubawk Branch YMA-in Aizawl Civil Hospital (ACH) tan unit 93 an pe a, a petute mipa 88 leh hmeichhia panga an ni. Khatla Branch YMA-in Synod Hospital tan unit 60 an pe a, a petute mipa 51 leh hmeichhia pakua an ni a; Zotuitlang YMA pawhin Lunglei Civil Hospital tan unit 49 an pe a, a petute mipa 36 leh hmeichhia 13 an ni. Kawrtethawveng YMA-in June 10 khan Mamit Hospital tan unit 32 pein, a petute mipa 29 leh hmeichhia pathum an ni. Bru Students Association, Aizawl chuan ACH-ah unit 21 an pe bawk.

Current-in man

June 11, 2016 khan Zorinpuia Leihang (17), Vartek khua chu Lawngtlai College Vengah electric current-in a man hlum. Thu dawn danin, Zorinpuia hi Lawngtlaiah pawl 11 admission ti turin a nu nen an kal a, Inrinni khan an thlenna in chunga tui dawhna tur an siam laiin electric current-in a man a, damdawi-in panpui a nih hnuah a hliam tuar loin a thi a ni.

Khelmual lai tan

Cheng nuai 10 senga Sihfa khelmual laih tur chu bialtu MLA Dr Ngurdingliana'n lei chêkin June 10, 2016 khan bul a ṭanpui. Sihfa khua hian khelmual
ṭha an neih loh avangin bialtu MLA hian a fund aṭangin a laihsak dawn a ni.

Invit hlum

June 10, 2016 tlai dar 6 vel khan Lawngtlai Bazar Vengah Lalram-enga, Zero Point, Saiha chuan Lalhmunzauva (32), Lawngtlai AOC veng a vit hlum. Thu dawn danin, Lalramenga leh Lalhmunzauva te hi thikthu vangin an insual a, Lalramenga chuan Lalhmunzauva chu a vit a, Lawngtlai damdawi-in panpui a nih hnuah a hliam tuar loin a thi a ni. Lalramenga hi police-te'n an mana , Zirtawpni zan khan Chief Judicial Magistrate thu angin District Jail-ah dah a ni.

Minister-in tlawh

Fisheries minister Dr BD Chakma chuan tun hnai khan Lunglei District Sericulture Office a tlawh a, thawktute'n harsatna an neih hrang hrang an lo thlente chu a theih ang anga tih-hlawhtlinsak a tum
thu a sawi.