District tinah Green Mizoram Day hmang

Inrinni khan district khawpui hrang hrangah Green Mizoram Day, 2016 hawnna hun hman a ni.

Aizawlah chuan Green Mizoram Day hawnna hun hi Hlimen Zophei-ah buatsaih a ni a, parliamentary secretary KS Thanga'n a hawng. Kumin ṭhál chhunga kângmei vennaa thawk ṭha khua thlana pakhatna Seling V/C hnenah Rs. 50,000, pahnihna Hualngohmun hnenah Rs. 30,000 leh pathumna Saitual Joint V/C hnenah Rs. 20,000 hlan a ni.

KS Thanga chuan, kum 18 chhung Green Mizoram Day hman a nih chhungin thing ṭiak tam tak phun a ni tawh tih sawiin, "Tunah chuan a enkawl zuina lamah hian ṭan lak a ngai hle. Green Mizoram Day hlawhtlinna hi kângmei chhuak leh chhuak loah a innghat thui hle," a ti.

Lungleiah chuan Pûkpuia Chawngbawla Hall-ah Green Mizoram Day hman a ni a; khuallian, HPC vice chairman S Laldingliana chuan, global warming chu thing leh mau tih chereu vanga a ni tih sawiin, tu leh fate chenna tlaka ram siam a nih theih nan mipuite chu thing phun enkawl zui turin a sawm.

Inkhawmah hian thing phun enkawl ṭha SDEO ‘N’, DAO leh Lunglei College NSS unit-te hnenah lawmman hlan a ni.

Champhaiah chuan CHANEM Complex-ah DC Vanlalngaihsaka'n a hawng a; kângmei ven kawnga tiṭha khaw pathum - Aiduzawl, Teikhang leh Kelkang hnenah lawmman hlan a ni. DC chuan, thing phun leh a enkawl zui uar turin mipuite a sáwm.

Lawngtlaiah chuan DC pisa tualah addl. DC R Lalsangluaia'n a hawng. Village Level Fire Prevention Award 2016 lawmman dawngtu pakhatna Bualpui NG-I, pahnihna Bungtlang 'S'-I leh pathumna Sangau-II hnenah lawmman hlan a ni.

Inkhawm zawhah LADC-a DCCF K Lalromawia chuan ṭhing tiak phun tur a sem a; sorkar department leh tlawmngai pawl hrang hrangte'n an thing phunna hmun tura an buatsaihah an phun nghal.

Kolasibah chuan bialtu MLA PC Zoram Sangliana'n Green Mizoram Day a hawng a; ram kang venna kawnga ti ṭha Thingdawl V/C, Bilkhawthlir North V/C leh Lungdai V/C hnenah lawmman an hlan.

PC Zoram Sangliana chuan, "Sorkar hma lakna piah lamah thing phun uar a, kan ram boruak tithianghlim tura mimal ṭhahnemngaihna mi tinin kan neih a ngai a ni," a ti.

Mamitah chuan LAD conference hall-ah addl. DC H Lianzela'n a hawng a; kângmei veng ṭha khaw pathum - pakhatna Tuidam, pahnihna Chungtlang leh pathumna Kanghmun hnenah lawmman hlan a ni. DFO Lalnunsanga tarlan danin, kum 1999 aṭanga 2015 chhungin Mamit-ah thing ṭiak 50,000 phun a nih tawh.

Serchhip district-ah erawh chuan a hawnna pui ber Thenzawlah neih a nih avangin a hranpaa hun hman a ni lo.