Biate-ah vawk 140 chuang thi tawh

Tunlaia Mizoram hmun hrang hranga vawk pûl hri léng mek, PRRS vangin nimin Pathianni thleng khan vawk 140 chuang a thi tawh a, vawk damlo mek eng emaw zat awmin, an dinhmun a ṭha lo hle.

Biate Branch YMA vice president R Lalremkunga hnen aṭanga thu dawn danin, Biate-a vawk hri len chungchang hi khawtlang hruaitute chuan June 1, 2016 khan Champhaia AH&Vety department hotute hnenah an thlen a; Biate-a vawk hri léng vang hian June 5 khan Champhai aṭangin Vety doctor-te'n Biate hi an tlawh. Sorkara report an thehluh aṭanga ni 12 chhungin vawk 140 chuang a thi tawh a ni.

Vety doctor-te chuan vawk damlote an en kual bakah, mipuite hnenah invên dan tur an zirtir a; laboratory-a enfiah turin vawk thi leh vawk damlo zinga 10-te thisen leh tîsâ an la. vawk 10 an enfiah aṭangin vawk paruk chu PRRS vei an ni tih finfiah a ni a, vawk palite chu eng ná nge tih hriat a nih lo. Vawk pakhat chu phai lama endik turin thawn a ni..

Biate-ah vawk thi a tam tawh avangin YMA-te chu vawk thi phûm hna thawkin an buai hle a; bialtu MLA Vanlalawmpuii Chawngthu chuan a phûmna atan JCB a hman (hire) sak a, MLA R Vanlalvena'n damdawi eng emaw zat a thawn bawk a ni.