Remna Ni pualin hun hman a ni

Naktuk June 30 hi Remna Ni a ni a, nimin khan Mizoram hmun ṭhenkhatah Remna Ni pualin hun hman a ni. Chief minister Lalduhoma chuan MZP-in LPS Arena-a Remna Ni puala hun hman a hmanpui a; Aijal Club-in nimin tlaia Aijal Club-a Remna Ni an hman chu Governor leh Chief Minister-in an hmanpui bawk.

MZP buatsaiha Remna Ni hmanaah hian minister leh MLA te, sorkar hotute leh Aizawla sikul 20 aṭangin zirlai eng emaw zat an tel a; Mizorama remna a awm theihna tura hma latute zinga mi pali - JH Roṭhuama, P Lalûpa, Lalthanzaua (L) leh Ngurchhina (L)-te hnenah chawimawina hlan a ni.

Chief Minister chuan, remna a awm theihna tura MNF hotu Laldenga'n independent sualna a titawp chu ropui a tih thu a sawi a, India sorkar hnuaiah rinawm taka awm turin Mizoram mipui a chah.

India sorkar anga hnam hnuaihnung leh tlem zawkte enkawlna ṭha pe thei ram dang an váng nia sawiin Lalduhoma chuan, "Independent pawh lo ni ta ila, tuna India sorkarin a thlawna min ṭanpuina ang min pe duh ram dang sorkar an awm ang em? India hi kan chungah a ṭha a, rinawm takin India sorkarah hian i awm ang u," a ti.

Chief Minister chuan, "India ramah ngei hian remna thuthlunga an lo ziah lan Greater Mizoram kan din ang. Remna thuthlung an siam lai khan Pu Laldenga'n Greater Mizoramah tuna Mizoram chhehvela Zo fate awmna chin zawng zawng Mizorama rîn luh a duh a, India sorkar khan Article-3 hnuaiah a la sawi zel theih a lawm an tih avangin hmalak chhunzawm turin a la awm," a ti a; India sorkar lakah buaina siam lo tur leh an rin ngama awm turin Mizo mipui a chah.

Lalduhoma chuan, Manipur, Myanmar leh Bangladesh aṭangin Zo hnahthlak raltlan mi 44,000 vel Mizoramah an awm mek thu sawiin, "Pathian hian thil tum a nei a ni ang tih ka ring. Keini ho zawng zawng hi rorelna pakhat hnuaia awm dan kan zir theihna turin tuna kan hun tawng hi Pathian remruat a ni ang em tih hi ka rilruah a lian em em a ni," a ti.

MZP buatsaiha Remna Ni hmannaah hian NGO Coordination Committee chairman Lalhmachhuana, Central YMA president leh MZP president Lalthianghlima te pawhin thu an sawi a ni.