Sum tihchingpen thubuaiah SBI hotu leh a thurualpui thiam loh chantir an ni

State Bank of India (SBI), Mission Veng Branch-a manager ṭhin Lalkhomang Guite leh Sacred Heart Society neitu Gary T Haokip te chu sum tihchingpen thubuaiah Special Court (Prevention of Corruption Act) chuan thiam loh a chantir a, nimin khan lung-inah dah luh an ni. July 1, 2024-ah hremna tur puan a ni ang.

Special Court (PC Act) thu­­rem­naa tarlan danin, Lalkhomang Guite leh Gary T Haokip te chu November 2006 leh October 2007 inkara self help group (SHG) hrang hrang hminga loan pek chhuah aṭanga sum eirua puh an ni. Mizoram Rural Development Society, Aizawl chairman K Lalremtluanga, Sacred Heart Society-a thawk Rosangkimi Ralte leh Upliftment of Back­ward Women SHG-a chairman Thantluangi te chu an thur­ual­puiah puh an ni bawk.

Court-a thubuai ngaih­tuah­naah thubuai chhuitu thuhretu mi 50 an inlan a, Special Court judge Dr HTC Lalrinchhana chuan nimin khan court thu­tlukna a puang. Lalkhomang Guite leh Gary T Haokip te chu PC Act Section 13 (2) r/w 13 (1)(d) leh IPC Section 120-B r/w 420, 468, 471 IPC tlawhchhanin thiam loh chantir an ni a, lung-inah dah luh nghal an ni.

An thurualpui Thangtluangi leh K Lalremtluanga te chu CBI-in an chhuinaah an thiam lohna an finfiah zo loah ngaiin chhuah zalen an ni a; Rosangkimi Ralte chu thubuai ngaihtuah a nih lai April 3, 2018 khan a thih avangin a thubuai ngaihtuah zui a ni lo.

CBI-in an chhuinaa tarlan danin, Lalkhomang Guite, Gary T Haokip leh Rosangkimi Ralte te chuan SHG lem pahnih - Nightingale SHG leh Ramdin SHG an phuah chawp a, chu SHG pahnih hming chuan loan Rs 5,00,000 ve ve pe chhuakin, an tichingpen zui a ni.

Lalkhomang Guite leh Gary T Haokip te chuan SHG 11 hnenah loan Rs 5,00,000 ṭheuh pe an chhuak a, mahse, chu'ng SHG-te chuan Rs 50,000 te, a ṭhenin Rs 1,00,000 chauhte an dawng a, a bak chu an tichingpen. KVIC hnuaia margin money pawh an tichingpen tih hmuh chhuah a ni bawk.

SHG 11-te chu - Gilgal SHG, Ropuiliani SHG, Bazar SHG-1, Beiseina SHG, Zanpar SHG, Nazareth SHG, Kumtluang SHG, Hawilopar SHG, Ainawn SHG, Bhakta SHG leh Ideal Mother SHG-te a ni.

Lalkhomang Guite, Gary T Haokip leh Thantluangi te chuan ‘Upliftment of Backward Women SHG’ hmingin loan Rs 5,00,000 an pe chhuak a, mahse, Rs 1,00,000 chauh SHG-in an dawng a, Rs 4,00,000 an tichingpen.

Lalkhomang Guite, Gary T Haokip leh K Lalremtluanga ten SHG pathum - Greenhill SHG, Zoawi SHG leh Mualmam SHG-te hmingin loan Rs 1,00,000 ṭheuh an pe chhuak a, mahse, SHG-te'n Rs 2,00,000 ṭheuh chauh an dawng thung.