LADC VC thlanah ZPM an che ṭha ber

June 27, Ningania Lai Autonomous District Council (LADC)-a village council inthlanpuiah ZPM-in seat 246 lain, VC 38-ah sorkarna an siam thei a, party mala che ṭha ber an ni.

LADC huam chhungah hian VC 99 a awm a, VC 97-ah inthlan buatsaih a ni a, vote thlak zawhah vote chhiar nghal a ni. Inthlanna VC 97-ah hian seat 582 a awm a, general seat 488 leh reserved seat (hmeichhe tana hauh) 94 a awm a ni a; candidate zawng zawng zat chu 1,511 a ni.

ZPM party-in VC 97-a seat awm zawng zawng 582 aṭangin seat 246 (42.27%) an la a, chungte chu general seat 203 leh reserved seat 43 a ni a; VC 38-ah sorkar siam theiin an chak.

MNF party-in seat 192 (general 162 leh reserved 30) lain, VC 25-ah sorkarna an siam thei a; Congress party-in seat 102 (general 89 leh reserved 13) lain, VC 12-ah an chak a; BJP-in seat sarih la mah se, VC siam theihna an nei lo. Independent candidate-te'n seat 43 (general 31 leh reserved 12) an la a, VC pakhatah party-te aiin an chak zawk. Party mala VC din thei (majority) awm lohna VC 22 a awm bawk.

LADC VC inthlanpuiah hian Hmawngbuchhuahah chuan chuh tuma hming pe lutte'n endikna (scrutiny) an paltlang zawh loh vek avangin inthlan buatsaih a ni lo. Saikhawthlirah candidate pangate chuhtu awm loin an tling a, vote thlâk a ngai lo bawk.

VC inthlanpuiah hian voter 55,342 awmin, mipa 27,225 leh hmeichhia 28,117 an ni a, vote 43,499 (78.60%) a tla a ni.